VOV4.Bahnar - Kiơ̆ đơ̆ng Kŏng ty Hnam kmăi ŭnh hơyŭh Dak Nông, lơ̆m 6 khei blŭng sơnăm, lơ̆m dêh char hlôi pơm kom đei 5 trĭu 550.000 kWh ŭnh hơyŭh. Tơdrong iŏk đei jơnei au gơnơm iung jang kơtang pơrô̆ pơrôp iŏk yua pơkom, jơnei. Dang ei, PC Dak Nông tŏk bŏk vei lăng, tĕch ŭnh hơyŭh ăn vă jê̆ 178.000 ‘nu tơmoi.

Iŏk yua ŭnh hơyŭh jơ̆ng ‘năr, hơnơng vei lăng kmăi kmŏk ‘nŏh vă pơkom ŭnh hơyŭh sơđơ̆ng hlŏh

‘Ngoăih jang ‘lơ̆ng bơ̆ jang vei lăng, hơnĭh atŏk kơtang pơrô̆ pơrôp kon pơlei, hơnĭh mơdro sa hơnơ̆ng dăr lăng, hơmet pơ ‘lơ̆ng tơlei păng kmăi kmŏk ŭnh hơyŭh sơđơ̆ng ‘lơ̆ng hơ iă. Kŏng ty pơtrŭt rim hơnĭh mơdro sa iŏk yua ŭnh hơyŭh lơ̆m jơ ‘năr rơhơi, hơmet ming iŏk yua ŭnh hơyŭh trŏ ƀlep păng pơkom. Hơnĭh jang ŭnh hơyŭh jei pơtrŭt kon pơlei pơm ŭnh hơyŭh jơ̆ng ‘năr tơ̆ pơbŭng hnam vă tơgop đei ŭnh hơyŭh sơđơ̆ng.

Tơblơ̆ nơ̆r: Amazưt