VOV4.Bahnar - Tơ̆ hơnăp jĭ hơbŭh Covid-19 tơ dêh char Dak Nông tơpoh kơtang, Kơdră chĕp pơgơ̆r Dơnŏ anĭh vei lăng kon pơlei dêh char Hồ Văn Mười pơrô̆ athei rim hơnĭh jang, rim tơring tơlĕch jang kơtang, iung jang hơnăp jang bơngai chĕp kơ̆l lơ̆m bơ̆ jang tang găn jĭ adoi jang kơtang tơdrong jang atŏk tơ iung mŭk drăm-tơpôl.

Vei lăng năng tông bơngai jĭ Covid-19 tơ̆ Hnam pơgang apŭng Cư Jut, Dak Nông

Jô̆ trŭh pơgê năr 23/2, lơ̆m dêh char Dak Nông đei 13.169 ‘nu bơngai jĭ Covid-19. Lơ̆m au lơ bơngai hlôi hơmet klăih ăn brŏk tơ̆ hnam. Lơ̆m 2 giĕng tơjê̆ au, tơdrong jĭ hơbŭh hơnơ̆ng tơpŏh kơtang. Tơ̆ hop akŏm trư̆k tuyên hăm rim apŭng, pơlei tơm găh bơ̆ jang tang găn jĭ hơbŭh, ƀok Hồ Văn Mười, Kơdră chĕp pơgơ̆r Dơnŏ anih vei lăng kon pơlei dêh char Dak Nông sơkơ̆t hơdăh, trong tơlĕch jang kăl hlŏh ‘nŏh vaccine hăm 5K. Kơdră chĕp pơgơ̆r dêh char Dak Nông athei, atŭm hăm jang tang găn jĭ hơbŭh Covid-19, kơdră chĕp pơgơ̆r rim hơnĭh jang, tơring kơrŭn đĭ jơhngơ̆m jang ‘lơ̆ng atŏk tơ iung mŭk drăm-tơpôl lơ̆m khei ‘năr hle.

Tơblơ̆ nơ̆r: Amazưt