‘Nau jing mĭnh lơ̆m dôm nơ̆r athei mă Hơnih bơ̆ jang vei lăng kon pơlei dêh char Đak Nông pơrô̆ athei vă atŏk kơtang bơ̆ jang ‘lơ̆ng tơlĕch kon jên jang kơ teh đak.

Sơnăm 2023, akŏp kon jên teh đak tơmơ̆t jên jang tơ̆ dêh char Đak Nông ‘nŏh 3.473 ti hlak jên. Truh vă đĭ khei 2, lơ̆m dêh char hlôi tơlĕch dang 185 ti hlak jên, jơnei 5% trong tơlĕch jang. Hơdrô̆ hăm rim tơdrong jang teh đak sơnăm 2023 đei kon jên tơmơ̆t jang vă jê̆ 1.120 ti hlak jên oei tim mă tơlĕch jang. Kon jên đei tơmơ̆t dơ̆ng đơ̆ng kon jên jang teh đak sơnăm 2022 ‘nŏh 758 ti hlak jên, dêh char ‘nao chă tơlĕch ăn lăp đei 17%. Tơ̆ hop akŏm pơtrŭt tơlĕch jên jang teh đak ‘nao au, ƀok Hồ Văn Mười, Kơdră chĕp pơgơ̆r Hơnih vei lăng kon pơlei dêh char Đak Nông athei rim apŭng, pơlei tơm, rim hơnih bơ̆ jang kăl iung jang mă ‘lơ̆ng, hơnơ̆ng pơma dơnuh dih băl, iung jang hơdoi kơjăp vă tơlĕch kon jên jang ƀlep tơdrong jang, ming man keh đang tĕnh koăng. Truh năr 30/6/2023, dôm tơdrong vă jang tim mă iung jang, tim mă tơlĕch kon jên jang ‘nŏh gô tơjur kon jên jang vă ăn rim tơdrong vă jang đei iung jang ‘lơ̆ng, hơdrin truh đĭ sơnăm 2023 tơlĕch kon jên jang jơnei trŭh 95%.