Lăp blŭng pơ yan phĕ iŏk cheh phe 2021-2022, tơ̆ dêh char Dak Nông hlôi đei ƀôh tơ drong phĕ tơ tông cheh phe. Dang ei dôm tơ ring hlôi hơ tŏk loi dơ̆ng tơ drong jang dăr joang, vei lăng, hơ dai hăm tơ drong tơ roi tơ băt kon pơ lei hơ tŏk ‘lơ̆ng đon kơ chăng vă vei lăng mŭk drăm lơ̆m pơ yan phĕ iŏk.

Lơ̆m pơ yan phĕ iŏk cheh phe, kon pơ lei hli tơ tăm kơ đe tơ tông klĕ roi tŏk

Vă vei sơ đơ̆ng lơ̆m pơ yan phĕ iŏk cheh phe, dôm tơ ring tơ̆ Dak Nông hlôi tŭn pran tơ drong jang tơ roi tơ băt, khan lê̆ hơ drol dôm trong jang, hơ lĕnh pơ dăr đơ̆ng dôm kơ loăi pơm glăi. Khŭl linh kŏng an tơ ring kŭm hơ tŏk loi dơ̆ng dăr joang, vei lăng tơ̆ dôm tơ ring tơm, vei lăng hơ nih đe oei sa hăm kơ sô̆ bơ ngai jang đơ̆ng nai, bơ ngai jang thuê kiơ̆ pơ yan... Kŏng an Dak Nông tơ tă kơ kon pơ lei mưh thuê bơ ngai jang kăl kơ hơ len lăng hla ar chĕp jơ̆ng ti păng pơm kiơ̆ tơ drong pơm hla ar oei pơ gia, krŭl pơ gia kiơ̆ tơ drong hơ găt.