Dơ̆ng lơ̆m mir pơgar ‘long krô̆i kam, kuyt jing ƀlĭk ƀlăk tơ̆ jơ̆ng kông ŭnh Nam Kar, mŏ Nguyễn Thị Mai, Kơdră chĕp pơgơ̆r Hơp tak xah Chŏh jang sa-Bri ‘long Quảng Phú, tơring Quảng Phú, apŭng Krông Nô ling lang ƀlŏk hơdơ̆r dôm khei ‘năr tơkơ̆ tơmo vă tơchă tĕh pơtăm ‘long. Mŏ tơbăt, vă pơtăm đei ‘long plei Krô̆i kam, kyut ‘lơ̆ng lơ̆m groi tĕh hrêl tơmo kông ŭnh, trong jang ‘nŏh hơdrin pơjing đei groi tĕh ‘ngiĕt chăt, tĕh rơhŭ rim sơnăm. Gơnơm hơdrin đĭ jơhngơ̆m, pơ̆n jang, đơ̆ng rŏng 5 sơnăm mŏ hlôi phĕ iŏk đei plei ‘ngam lơ̆m groi tĕh rang rar.

Hlŏh 4 ha krô̆i kam, kuyt phĕ iŏk đei vă jê̆ 100 tân lơ̆m 1 sơnăm, đei rim bơngai kĭ pơkăp răt iŏk kơtă tơ̆ mir pơgar hăm kơ jă sơđơ̆ng 35.000 hlak jên lơ̆m 1 kĭ. Plei ‘long mŏ pơtăm au dang ei đei tĕch mơdro tơ̆ rim siu thĭ tơ̆ pơlei tơm Hồ Chí Minh, Bình Dương, Hà Nội păng rim dêh char tơjê̆. Đơ̆ng iŏk jơnei au, mŏ Mai jang hơdoi hăm rim ŭnh hnam lơ̆m tơring, pơjing Hơp tak xah chŏh jang sa rơgŏh ‘lơ̆ng, tơmơ̆t đei hlŏh 50 ‘nu bơngai jang hăm lơ̆m 1 khei jang sa iŏk đei jô̆ hơtŏ 10 trĭu hlak jên.“Hlŏh 20 sơnăm tĕch mơdro plei ‘long, ƀum ‘nŏh ĭnh đei tơmoi răt iŏk ‘nŏh bơngai Nhật jei đei chă tơbăt ăn trong jang sa. Đơ̆ng nŏh hŏk kiơ̆ lơ̆m hla bơar, chă tơmang lăng đe jang sa tơ̆ au tơ̆ to dơ̆ng kơna mư̆h pơtăm ‘nŏh ba hơdrin. Hơp tak xah jei tŏk bŏk pơih să hơgăt tĕh đơ̆ng nŏh chă ơng dơđăh hơdrĕch păng gô lang să tơring vă pơjing đei tơring kăl lơ̆m cham char groi tĕh kơ plei tĕh au...”

Jei iung đei ƀô̆h đơ̆ng tĕch mơdro chehphe rơgŏh ‘lơ̆ng, mŏ Đậu Thị Nguyệt, oei tơ̆ Koeng kơphô̆ 4, thĭ trân Đak Mâm, apŭng Krông Nô, hlôi atŏk tơ iung jing Hơp tak xah Tín true coffe. Hrei au Hơp tak xah đei 7 ‘nu bơngai păng jang hơdoi hăm 20 ŭnh hnam kon pơlei jang chehphe rơgŏh ‘lơ̆ng, pơjing đei 8 kơ loăi chehphe puk ‘lơ̆ng, păng tŏk bŏk chă tơchĕng hơlen pơjing đei tơmam drăm đơ̆ng pơkao păng đơ̆ng kơđŏh plei chehphe. Mŏ Đậu Thị Nguyệt tơbăt:“Hŏk pơhrăm răh jang răh păng chă hŏk pơhrăm đơ̆ng au đơ̆ng to dơ̆ng đơ̆ng nŏh pơjing Hơp tak xah pơm đei tơmam drăm rơgŏh ‘lơ̆ng vă tĕch mơdro ăn rim bơngai chă huch đak chehphe rơgŏh ‘lơ̆ng dơ̆ng, ba jei ư̆h kơ đei chă răt dôm tơmam drăm đơ̆ng au đơ̆ng to kơna tôch kơ ‘lơ̆ng. Ĭnh hơpơi ‘mĕh vă kon pơlei lơ̆m hơp tak xah mĭnh jơhngơ̆m đon, hơp tak xah jei hơdrin jang đơ̆ng iĕ pơm lơ liơ pơjing đei tơdrong jang sa ăn rim bơngai chă jang sa iŏk yua sơđơ̆ng hlŏh.”

Kiơ̆ đơ̆ng mŏ Nguyễn Thị Mai, Kơdră chĕp pơgơ̆r Khŭl drŏ kăn thĭ trân Đak Mâm, apŭng Krông Nô, dôm trong jang drŏ kăn hơdrin yak hlŏh tơnap tap atŏk tơ iung mŭk drăm đei iŏk yua kơjăp hlôi hơnhăk đei tơdrong hơ iă hlŏh, tơgŭm ăn pơmai ŏh pơ̆n hlŏh dơ̆ng lơ̆m tơdrong jang sa, hơnăp jang đơ̆ng kơ dĭh lơ̆m ŭnh hnam păng lơ̆m tơpôl:“Đơ̆ng tơdrong jang sa iŏk đei kơjăp ‘nŏh kơna jei ƀô̆h hơdăh hơnăp jang, hơnĭh dơ̆ng kơ drŏ kăn roi năr roi atŏk loi dơ̆ng. Đơ̆ng dôm trong jang sa blŭng a au kơna rim khŭl hlôi hơlen kiơ̆ trong jang hơ iă vă pơ̆n đei trong bơ̆ jang ‘lơ̆ng hơ iă hlŏh tơlĕch ăn jang kiơ̆ đơ̆ng rŏng hăm hơpơi ‘mĕh vă, hăm dôm pơmai ŏh đei trong tơchăr hơ iă, hưch hanh hăm tơdrong jang ‘nŏh bơ̆n tơgŭm djru hloi vă rim pơmai ŏh ‘nŏh jang sa đei iŏk yua kơ jăp hăm trong jang sa mă đe sư rơ̆ih iŏk kơdĭh.”

Yă H’Vi Ê Ban, Kơdră chĕp pơgơ̆r Khŭl drŏ kăn dêh char Đak Nông tơbăt, vă atŏk kơtang tơdrong lui kơdĭh, tơdrong pơ̆n iung jang đơ̆ng pơmai ŏh, khei năr aui ki, rim khŭl drŏ kăn lơ̆m dêh char pơgơ̆r lơ tơdrong jang hơ iă, tơchăr hơgei, trŏ lăp hăm yan au. Lơ trong jang sa, vei lăng năng tông, yak hơdoi tơgŭm djru pơmai oh tŏk bŏk đei jơnei hơ iă. Tơgŭm pơmai ŏh đei rơvơn atŏk tơ iung, ‘moi kiơ̆ dơ̆ng pang tang măt đơ̆ng Dơnŏ anĭh mong jên tơgŭm djru Tơpôl păng kon jên Hơnĭh mong jên tơchă tơdrong jang, khŭl drŏ kăn rim hơnĭh hlôi tơlĕch hlŏh 1.000 ti hlak jên, ăn hlŏh 23.000 ‘nu pơmai ŏh tŏk iok vă jang sa atŏk tơ iung mŭk drăm.“Lơ̆m khei năr kơnh, Khŭl drŏ kăn dêh char jei gô hơnơ̆ng tơlĕch tơdrong jang drŏ kăn hơdrin yak hlŏh dơnuh hin, pơm tơm lơ̆m erĭh sa. Mă hơdăh nhôn jang kiơ̆ ‘lơ̆ng Tơdrong vă jang drŏ kăn pơjing tơdrong jang sa sơnăm 2017-2025. ‘Ngoăih kơ ‘nŏh nhôn jei gô vă iung jang hơdoi hăm rim hơnĭh bơ̆ jang vă pơtho pơjing tơdrong jang păng tơƀô̆h tơbăt tơdrong jang kiơ̆ tơdrong ‘mĕh vă krao tơmơt jang đơ̆ng tơpôl păng nhôn jei tơgŭm djru drŏ kăn gơ̆h chă tŏk iŏk kon jên vă tơjur dơnuh păng atŏk tơ iung mŭk drăm.”

Hăm jơhngơ̆m đon hơbăch hơbal, tơchăr hơgei, lui kiơ̆ kơjăp, drŏ kăn Đak Nông tŏk bŏk roi năr roi sơkơ̆t hơdăh hơnăp jang kơ dĭh mư̆h pơm tơm rim trong jang atŏk tơ iung mŭk drăm, atŏk jang sa iŏk yua kơ jăp păng pơjing đei lang să lơ̆m tơpôl.