VOV4.Bahnar - Yua kơ liơ tơ til 3 sơ năm tơ jê̆ âu, Dak Nông ling lang tơ̆ hơ tuch kơ ƀang chih pơ rĕng điêm pơ long tốt nghiệp trung học phổ thông teh đak. ‘Nâu jĭ tơ drong tơ tŏ đei tơ roi tơ̆ ‘Măng hop akŏm mă 4, Jơ nŭm pơ gơ̆r kon pơ lei dêh char Dak Nông jăl IV pơ gơ̆r lơ̆m 2 năr âu ki. ‘Măng pơ long tốt nghiệp THPT sơ năm 2022, Dak Nông đei kơ sô̆ đâ̆u tốt nghiệp iŏk đei 96,7%; điêm jô̆ păh lăp đei 5,9 điêm, dơ̆ng mă 61/63 dêh char, pơ lei tơm lơ̆m teh đak.

Jơ nŭm pơ gơ̆r kon pơ lei dêh char Dak Nông apĭnh jet găh tơ drong ‘lơ̆ng pơ tho pơ hrăm

‘Nâu jĭ sơ năm mă 3 tơ til Dak Nông tơ̆ grŭp hơ tuch kơ ƀang chih pơ rĕng điêm pơ long tốt nghiệp trung học phổ thông. Pơ ma tơ blang tơ̆ hơ năp Jơ nŭm pơ gơ̆r kon pơ lei dêh char Dak Nông, ƀok Nguyễn Văn Toàn, Kơ dră Anih vei lăng găh pơ tho pơ hrăm dêh char Dak Nông, pơ ma tơ blang tơ drong tơm pơm ăn ‘noh jĭ yua đơ̆ng kơ sô̆ hŏk tro hŏk hơ gei tơ̆ dêh char tŏ sĕt, kơ na điêm jô̆ păh lăp dôm môn pơ long tŏ sĕt. Thim dơ̆ng ‘noh jĭ lơ hŏk tro hlôi iŏk yua học bạ vă set điêm mơ̆t hŏk đăi hŏk, tơ drong vang pơ long lăp vă iŏk điêm tốt nghiệp đĕch. Hăm tơ ring oei lơ mơ mat tat nhen Dak Nông, ƀok Nguyễn Văn Toàn akhan mơ mat tat gô kĕ jăh tơ plih tơ drong dơ̆ng hơ tuch hơ drol lơ̆m pơ long tốt nghiệp kơ dêh char.   

Thuem: Tơ blơ̆