VOV4.Bahnar - Nhen nhôn hlôi tơ roi, tơ drong “tĕh tŏk kơ jă” tơ̆ dêh char Dak Nông đơ̆ng hơ tuch sơ năm sơ̆ truh dang ei oei tam mă jur kiơ. Kơ plăh ‘nŏh, lơ groi kông đei chưk hơ met glăi luơ̆t vă iŏk tĕh tĕch mơ dro. ‘Moi dơ̆ng ƀai chih “Pơ vĕr pơm hla ar tơ plih tĕh jing tĕh kăp gĭt tơ̆ Dak Nông: Tơ drong glăi tôch lơ, sek tơ lang pơ lôh pơ lônh” năr ‘nâu nhôn đei ƀai chih tăl 2 hăm hơ năn “Dak Nông pơm thoi yơ vă găn đei tơ drong pơ vĕr pơm hla ar tĕh jing kơ loăi tĕh kăp gĭt”.

Lơ̆m khei ‘năr đe chă răt tĕh tôch dêh đơ̆ng sơ̆ tam mă biơh đei, kơ jă tĕh tơ̆ xăh Nhân Cơ, apŭng Dak R’Lấp, dêh char Dak Nông oei tôch kơ jung păng kiơ̆ hơ dai hăm 'nŏh jĭ, lơ kông lôk đei chưk hơ met glăi luơ̆t vă tĕch mơ dro. Ƀok Phạm Văn Quân, Phŏ Kơ dră vei lăng kon pơ lei xăh Nhân Cơ ăn tơ băt, lơ bơ ngai đei chă ƀôh mă lei xăh ưh kơ băt vă sek tơ lang thoi yơ: “Anih jang Tư phap, Anih vei lăng tơ mam drăm cham char jur tơ̆ âu vang bơ̆ jang ră. Bơ ngai jang tơ̆ âu tơ tă bơ ngai jang ăn kơ đe ngăl đĕch. Mưh ‘mĕh sek tơ lang ‘nŏh athei sek tơ lang tơ ‘ngla tĕh, mă lei mưh vă pơ ma nuh hăm tơ ‘ngla tĕh ‘nŏh ưh kơ gơh, bơ ngai ‘nŏh tơ̆ Sài Gòn ưh chu tŏk. Đe hơ nơ̆ng pơ vĕr thoi noh, kơ na mưh sek tơ lang tôch mơ mat yoa đei bơ ngai roi tơ ƀôh luơ̆t ăn đe sư, vĕh ver luơ̆t, kơ na tôch mơ mat. Nhôn kŭm pơm hla ar găn đĭ tơ drong jang tơ̆ tĕh ‘nŏh bơih, mă lei ưh kơ sĭ lai yơ kŭm ăn ‘nhŏng ŏh năm lăng tơ̆ noh ôh.”

Chưk hơ met kông lôk glăi luơ̆t tơ̆ tơ ring jê̆ gơng Đak Tih, xăh Nhân Cơ, apŭng Đak R'Lấp

Ƀok Lê Văn Hoàng, Phŏ Kơ dră vei lăng kon pơ lei apŭng Dak Mil, dêh char Dak Nông ăn tơ băt, đei 1,2 tơ drong mơ mat tat păng ưh kơ lăp lơ̆m tơ drong sek tơ lang bơ ngai chưk hơ met tĕh tơ̆ groi kông glăi kơ luơ̆t. Mă 1 ‘nŏh jên phak dang ei lăp tŏ sĕt đĕch, kiơ̆ tơ drong hơ găt 91 sơ năm 2019 găh sek phak jên ƀơm truh tơ̆ phă ngơ̆r tĕh ‘nŏh lăp phak tôch ai tơ̆ xăh jĭ 5 triu, tơ̆ apŭng 'nŏh 50 triu. Kơ plăh 'nŏh kơ jă tĕh đơ̆ng rŏng kơ chưk hơ met tŏk truh kơ ti hlak jên, bơ ngai pơm glăi chu pŭ păng chu nôp jên. Tơ drong 'nâu kăl đei set hơ len dơ̆ng, tơ plih ming vă khôi luơ̆t gơ̆h tơ mât yoa 'lơ̆ng tơ̆ yăn âu, gơ̆h tơ hli bơ ngai pơ rơ̆ng pơm glăi: “Tĕh groi kông mă chưk hơ met bơih ‘nŏh tôch mơ mat vă gơ̆h pơm ming nhen blŭng a dơ̆ng. Hrei ‘nâu Khul kơ dră tĕh đak oei chih hla ar vă hơ met ming luơ̆t tĕh, găh tơ ring kŭm đei nơ̆r apinh hăm anih jang kơ pal vă gơ̆h đei trong hơ met ming mă lăp păng gơ̆h tơ mât yoa tơ̆ yăn âu.”

Kiơ̆ ƀok Đỗ Tấn Sương, Kơ dră vei lăng kon pơ lei plt Gia Nghĩa, ƀât mă kơ jă tĕh lơ̆m plt oei tŏk, oei pơm ăn lơ bơ ngai chă răt ‘nŏh tơ drong chĕng tĕch tĕh, chưk kông lôk oei đei hơ nơ̆ng đĕch. Oei tơ drong ‘mĕh đei tĕh vă ming man đơ̆ng kon pơ lei ‘nŏh đei tơ pă, mă lei tơ drong tơ prŏh trong chĕng hơ met tĕh hrei ‘nâu tam mă pơm lăp hăm yăn âu, mă hơ dăh lăp đei 6.000ha/27.000ha păng akŏm lơ tơ̆ tŏk bŏk plt: “Hlôi pơ yan jĭ ‘nŏh lơ bơ ngai tơ̆ Sài Gòn, Bình Dương, Đồng Nai ‘mĕh răt 5-7 sao, 1 ha, kŭm ‘mĕh đei hnam, pơ gar, mir rŏh. Mă lei mơ mat tat hlŏh đơ̆ng bơ̆n hrei ‘nâu ‘nŏh jĭ tam mă sek tơ lang tơ tom hnam pơ gar, mir roh ‘nŏh. Yoa tĕh ‘nŏh, jĭ tĕh choh jang, plt tam mă chĕng hơ met đang ‘lơ̆ng, tam mă drŭh kiơ̆ tom tơ̆ yăn âu. Oei ‘mĕh jang tơ drong kiơ ‘nŏh athei đei trong tơ prŏh, chĕng hơ met hơ drol ‘mơ̆i.”

Chưk hơ met tĕh glăi luơ̆t tơ̆ Dak Nông khei ‘năr âu ki đei tôch lơ

Kơ plăh ‘nŏh, ƀok Nguyễn Anh Tú, Kơ dră vei lăng kon pơ lei apŭng Cư Jút, dêh char Dak Nông akhan, lê̆ đei tơ drong chưk groi kông, pơm tơ hnă tĕh glăi luơ̆t ‘nŏh hơ năp athei pŭ đơ̆ng khul kơ dră tơ ring tôch tih: “’Ngoăih kơ tơ drong sek tơ lang bơ ngai pơm glăi ‘nŏh athei hơ len năng truh hơ năp jang đơ̆ng xăh, thĭ trơ̆n hai, athei lăng năng dơ̆ng tơ drong jang vei lăng tĕh tam mă ‘lơ̆ng ưh. Tơ dăh đei lơ tơ drong glăi, ‘nŏh athei hơ len năng hơ năp jang đơ̆ng đe kăn ƀô̆ tơ̆ noh, mă loi jĭ đe bơ ngai jang pơm hla ar tĕh păng jô̆ hloi bơ ngai chĕp kơ̆l xăh.”

Ƀok Lê Trọng Yên, Phŏ Kơ dră vei lăng kon pơ lei dêh char Dak Nông pơ ma hơ dăh, tơ drong chưk kông pơm tĕh pơ gar glăi luơ̆t vă tĕch khei ‘năr âu ki đei lơ tơ pă. Tơ drong tĕch mơ dro tĕh, pơm hla ar tĕh tơ̆ 1,2 tơ ring oei ưh kơ rơ đăh, ưh kơ lăp, 1 păh ‘nŏh yoa dôm tơ drong hơ găt đơ̆ng tĕh đak, kŭm nhen tơ ring tam mă kơ jăp. Tơ drong ‘nâu jing pơm ăn tĕh đak ưh iŏk đei jên thuê̆, trong tơ proh jing ưh đei pơm kiơ̆ păng tơ drong tĕch mơ dro tĕh jing ưh sơ đơ̆ng. Vă hơ met ming, Khul kơ dră chĕp kơ̆l đảng kơ Dơ nŏ anih vei lăng kon pơ lei dêh char oei pơ tho chih tơ lĕch tơ drong tơ chơ̆t găh tơ drong bơ̆ jang ăn tĕh đak đơ̆ng bơ ngai chĕp kơ̆l dêh char truh tơ̆ xăh, phương, Kueng kơ phô̆:

“'Nao âu Khul kơ dră tĕh đak kŭm tơ lĕch tơ drong hơ găt găh bơ̆ jang ƀơm truh tơ̆ tĕh, tơ drong 'nâu Dơ nŏ anih vei lăng kon pơ lei dêh char hlôi pơ jao ăn Anih vei lăng tơ mam drăm, cham char dêh char pơ gơ̆r jang hơ doi hăm Anih vei lăng ming man, dôm tơ ring vang roi tơ ƀôh ăn dêh char vă hơ met ming tơ drong tĕch mơ dro tĕh gơ̆h trŏ luơ̆t. Mă 2, 'nŏh jĭ tơ drong vei lăng tĕh, chĕng tĕch tĕh păng ming man. Athei đei lơ tơ drong hơ găt vă tơ ring hơ tŏk tơ drong dăr lăng. Tơ drong mă 3 'nŏh athei hơ len năng hăm pă đei tơ drong kiơ ưh kơ jăp lơ̆m tơ drong tơ chơ̆t 22 sơ năm 2021 đơ̆ng Dơ nŏ anih vei lăng kon pơ lei dêh char vă hơ met pơ ‘lơ̆ng tơ drong pơ jing trong iŏk yoa tĕh, vă huei đei grŭp xa pơ gâm, chĕng hơ met tĕh ưh trŏ tơ drong hơ găt păng trong iŏk yoa tĕh hlôi đei kĭ ăn.”

Tơ drong chă chưk hơ met tĕh, kư̆ kă ưh hli kiơ đơ̆ng dôm bơ ngai pơm glăi kŭm hăm tơ drong vei lăng ưh kơ jăp đơ̆ng khul kơ dră dôm tơ ring kŭm jing trong vă đe pơ vĕr kơ luơ̆t, ver tơ drong phak păng tơ drong vei lăng tĕh đơ̆ng kăn ƀô̆ tơ̆ tơ ring. Lơ tơ ring đei ƀôh tơ drong glăi, grŭp xa pơ gâm, kăl đei tơ drong vang jang tang găn, sek tơ lang mă tơ păt đơ̆ng dôm khul kơ dră tơ ring tơ̆ dêh char Dak Nông.

Dơ̆ng: Tơ blơ̆