VOV4.Bahnar - Jăl jang 2006-2021, Dak Nông jĭ dêh char tơ jur dơ nuh hin hrĕnh hloh tơ ring  Tây Nguyên. Dêh char kŭm tŏk bŏk tơ lĕch lơ trong jang vă hơ nơ̆ng tơ jur dơ nuh hin hrĕnh păng kơ jăp. Kiơ̆ kơ sô̆ chih jô̆ đơ̆ng Anih jang chih jô̆ hơ len, Jăl jang 2006-2021 Dak Nông jĭ dêh char dơ̆ng hơ drol tơ ring Tây Nguyên păng jĭ 1 lơ̆m 10 dêh char tơ jur dơ nuh hin hrĕnh hloh lơ̆m teh đak hăm tơ drong tơ jur đei 18,3% kơ sô̆ ŭnh hnam dơ nuh hin.

Tơ plih ming ‘long pơ tăm hlôi tơ gŭm lơ ŭnh hnam kon pơ lei tơ̆ Dak Nông klăih đơ̆ng dơ nuh hin

Tơ mơ̆t yua tơ drong tơ chơ̆t 07 sơ năm 2021 hơ găt dơ nuh hin lơ trong jăl jang 2021-2025 (kiơ̆ dơ nuh hin ‘nao), dêh char Dak Nông dang ei oei hloh 18.200 ŭnh hnam dơ nuh hin, đei 11,2% kơ sô̆ ŭnh hnam lơ̆m tơ ring. Lơ̆m noh, đei 2/3 kơ sô̆ ŭnh hnam dơ nuh hin ‘noh jĭ bơ ngai kon kông. Anih jang Đảng dêh char Dak Nông hlôi tơ lĕch tơ drong tơ chơ̆t, Anih vei lăng kon pơ lei dêh char tơ lĕch trong vă jang hơ găt tơ jur tŏ sĕt hloh 3% ŭnh hnam dơ nuh hin 1 sơ năm, hloh 2 ‘măng tơ drong hơ găt đơ̆ng tơ drong jang teh đak. Tơ drong hơ găt đơ̆ng Dak Nông oei lơ hloh hăm tơ ring kon kông ƀơ̆t tơ lĕch ăn tơ drong hơ găt tơ jur đơ̆ng 5% tơ̆ kơ pal. Dêh char hơ drin truh sơ năm 2025 ưh pă đei ŭnh hnam dơ nuh hin kiơ̆ pơ kăp ‘nao.

Thuem: Tơ blơ̆