VOV4.Bahnar - ‘Nao au, Dơŏ anĭh dăr lăng dêh char Dak Nông hlôi tơbăt hơdăh găh rim tơdrong glăi găh tơdrong groi tĕh tơ̆ tơring lơ̆m dêh char. Lơ̆m nŏh, mă kăl ‘nŏh tơdrong ƀơk glăi tơchơ̆t 65 Hla bơar pơm tơngla tĕh ăn rim ŭnh hnam tơ̆ tơring Dak Som, apŭng Dak Glong, kăl iŏk tơvĭh dơ̆ng. Mă lei, hlôi erĭh sa păng jang sa sơđơ̆ng; Hla bơar pơm tơngla tĕh au kon pơlei jei hlôi pơdơ̆ng tơ̆ rim hơnĭh mong jên vă tŏk iŏk jên. Tơdrong iŏk tơvĭh rim hla bơar pơm tơngla tĕh au tơƀơ̆p tôch tơnap tap.

Tĕh hlôi ƀơk ăn Hla bơar pơm tơngla tĕh păng tŏk bŏk pơdơ̆ng tơ̆ Hơnĭh mong jên

‘Nhŏng Lê Minh Cà Na tơbăt, ŭnh hnam ‘nhŏng đei ƀar hlak mir să vă jê̆ 8ha 5 sao tơ̆ thôn 4, tơring Đak Som, apŭng Đak Glong hlôi đei ƀơk ăn Hla bơar pơm tơngla tĕh đơ̆ng sơnăm 2017. Ŭnh hnam hlôi pơdơ̆ng tơ̆ Hơnĭh mong jên, tŏk iŏk 4 ti 500 trĭu hlak jên, kơna tơdrong vă iŏk tơvĭh ‘nŏh tơƀơ̆p tôch tơnap tap.“Ŭnh hnam nhôn oei tơ̆ au đơ̆ng nŏh răt tĕh đe đơ̆ng sơnăm 1998 păng chŏh jang sa. ‘Măng blŭng ‘nŏh pơtăm chehphe, đơ̆ng rŏng ‘nŏh tơplĭh pơtăm ‘long sa plei. Trŭh sơnăm 2015 ‘nŏh akŏm pơtăm pơle. Akŏp kon jên tơmơ̆t jang ăn mir au ‘nŏh trŭh mơjĭt ti hlak jên. ‘Nao au ŭnh hnam nhôn kơtơ̆ng kơdră tơring, apŭng tơbăt akhan vă iŏk tơvĭh hla bơar pơm tơngla tĕh, mŭk drăm lơ̆m hơgăt tĕh, tơdrong vă iŏk tơvĭh au gơ̆h đơ̆ng yơ, nhôn tŏk bŏk pơdơ̆ng tơ̆ hơnih mong jên bơih lĕ”.

Lơ̆m hơgăt tĕh ƀơk ăn glăi, đĭ đăng kon pơlei pơtăm chehphe, tiu, ‘long sa plei

Jei lei lăi, ŭnh hnam ƀok K’Hai đei vă jê̆ 2 ha 2 sao mir chehphe pơtăm hrou hăm tiu tơ̆ thôn 4, tơring Đak Som, apŭng Đak Glong, jei hlôi ƀơk ăn Hla bơar pơm tơngla tĕh tơ̆ hơnĭh mong jên đơ̆ng sơnăm 2017, păng hlôi pơdơ̆ng ăn Hơnĭh mong jên vă tŏk iŏk jên. Dang ei kơtơ̆ng kơdră chĕp pơgơ̆r tơring tơroi vă iŏk tơvĭh hla bơar pơm tơngla tĕh, ƀok K’Hai tôch tơtăm, mă lei jei ư̆h kơ băt vă pơm lơ liơ: “ ‘Măng blŭng kang ƀô̆ bơ̆ jang vei lăng groi tĕh tơring krao nhôn năm vă ƀơk ăn hla bơar pơm tơngla tĕh. Đe sư krao akŏm rim ŭnh hnam tơ̆ Hnam hop akŏm kơ Dơnŏ anĭh vei lăng kon pơlei tơring Đak Som vă lăng hơlen tơdrong ƀơk ăn Hla bơar tơngla tĕh. Đe hăp apinh rim mir, mir nhôn tơtir hăm mir bu, hăm đei chă tơgar dĭh băl au to ưh, tơdăh ư̆h ‘nŏh pơm ăn Hla bơar pơm tơngla tĕh. Mư̆h đei hla bơar pơm tơngla tĕh ‘noh ŭnh hnam nhôn pơdơ̆ng tơ̆ Hơnĭh mong jên vă tŏk iŏk 300 trĭu hlak jên bơih, dang ei Tĕh đak akhan vă iŏk tơvĭh ‘nŏh nhôn đei kon jên đơ̆ng yơ vă pơdreo jên ăn hơnĭh mong jên  na ơ̆h iŏk tơvĭh Hla bơar pơm tơngal tĕh au”

Kiơ̆ tơchơ̆t 140 kơ Dơnŏ anĭh bơ̆ jang dăr lăng dêh char Dak Nông, tơ̆ tơring Dak Som, apŭng Dak Glông đei 65 hlak Hla bơar pơm tơngla tĕh kăl vă iŏk tơvĭh. Akhan, tĕh au hlôi đei Dơnŏ anĭh vei lăng kon pơlei dêh char Dak Lăk (sơ̆) pơjao ăn Viện Khoa học Lâm nghiệp Nam Trung Bộ păng Tây Nguyên đơ̆ng sơnăm 2003, găh pơprŏ ăn 3 kơ loăi bri. Hrei au, Dơnŏ anĭh vei lăng kon pơlei apŭng Dak Glong păng tơring Dak Som hlôi năm tơroi tơbăt ăn rim ŭnh hnam athei rim ŭnh hnam năm ba ăn dơ̆ng Hla bơar pơm tơngla tĕh. Tơdăh ư̆h kơ năm ba ăn, apŭng gô sut sa hŭt hloi tơdrong pơm tơngla tĕh au. Mă lei, lơ̆m 65 hlak Hla bơar pơm tơngla tĕh hlôi ƀơk ăn glăi, găh lơ kon pơlei hlôi pơdơ̆ng tơ̆ Hơnĭh mong jên vă tŏk iŏk kon jên tơmơt jang sa. Kơ yuơ lơ loh, ƀok Nguyễn Hồ Hữu - Kơ iĕng Kơdră chĕp pơgơ̆r Dơnŏ anĭh Mong jên tĕh đak kơ dêh char Dak Nông akhan: rim hơnĭh bơ̆ jang kơ dêh char Dak Nông kăl pơm hơdăh dôm bơngai chĭu pŭ mư̆h ƀơk tĕh glăi hăm tơdrong tơchơ̆t.“Dang yơ đe pơdreo tôm kon jên tŏk iŏk păng kon jên chĕh ‘nŏh Hơnĭh mong jên mă pơdreo Hla bơar pơm tơngla tĕh dăh mă muk drăm pơdơ̆ng ăn. Tơdrong mă au kăl pơm kiơ̆ ƀlep tơdrong tơchơ̆t lơ̆m Tơdrong tơchơ̆t 39. Rim hơnĭh mong jên đe sư ăn tŏk iŏk hlôi bơ̆ jang ƀlep, ư̆h kơ đei glăi hăm tơdrong tơchơ̆t ôh. Găh tơdrong ƀơk glăi hla bơar pơm tơngla tĕh đơ̆ng nŏh năm pơdơ̆ng vă tŏk iŏk kon jên ‘nŏh Khul kơdră tơring đe sư xek tơlang dôm bơngai pơm glăi, tơdrong xek tơlang hơmet pơ ‘lơ̆ng lơ liơ ‘nŏh đơ̆ng rŏng au kơnh dơnŏ anĭh bơ̆ jang kăl chă pơma dơnŭh dĭh băl mă hơlen ‘moi kiơ̆ tơdrong tơchơ̆t kơ Khôi luơ̆t groi tĕh nhen tơdrong tơchơ̆t kơ Dơnŏ anĭh mong jên”

        Tơdrong tơchơ̆t đơ̆ng Dơnŏ anĭh dăr lăng dêh char Dak Nông, Dơnŏ anĭh vei lăng kon pơlei apŭng Dak Glong tơbăt tơdrong iŏk tơvĭh 65 hlak hla bơar Pơm tơngla tĕh ƀơk ăn glăi tơ̆ tơring Dak Som tơpă. Mă lei trŭh khei ‘năr dang ei, tơdrong iŏk tơvĭh tơƀơ̆p tôch tơnap tap, kơ yuơ đĭ đăng dôm hla bơar pơm tơngla tĕh jei đĭ pơdơ̆ng tơ̆ Hơnĭh mong jên. Ƀok Lê Văn Đại - Kơdră chĕp pơgơ̆r Dơnŏ anĭh vei lăng kon pơlei tơring tơbăt:“Nhôn hlôi tơroi tơbăt, chĭh pơklep tơ̆ hơnĭh bơ̆ jang tơring, rim koeng kon pơlei oei păng tơroi tơbăt hăm al loa vă tơroi tơbăt ăn kon pơlei băt hơdăh tơdrong Tĕh đak ƀơk glăi ‘nŏh kăl iŏk tơvĭh. Mă lei tơdrong tơnap tap tơ̆ au ‘nŏh găh lơ Hla bơar pơm tơngla tĕh rim ŭnh hnam hlôi hơnhăk ba pơkơ̆ng tơ̆ Hơnĭh mong jên vă tŏk iŏk kon jên jang sa”

Ƀok Trần Nam Thuần - Kơdră chĕp pơgơ̆r Dơnŏ anĭh vei lăng kon pơlei apŭng Dak Glong tơbăt, lơ̆m 65 hlak hla bơar pơm tơngla tĕh iŏk yua tĕh glăi hăm tơdrong tơchơ̆t, kơ dĭh ƀok jei hlôi kĭ ƀơk ăn 45 hlak hla bơar pơm tơngla tĕh. Mă lei, tơdrong iŏk tơvĭh tŏk bŏk tơƀơ̆p tôch tơnap tap:“Ĭnh jei hlôi pơjao ăn tơring vă đe sư tơroi tơbăt păng bơ̆ jang hloi hăm rim ŭnh hnam, đơ̆ng nŏh jei chă pơrô̆ pơrôp, krao hơvơn kon pơlei ba ăn dơ̆ng Hla bơar pơm tơngla tĕh ƀơk ăn glăi au. Kơtơ̆ng ‘nhŏng ŏh chă tơroi dơ̆ng ‘nŏh jei hlôi iŏk tơvĭh đei 60 lơ̆m 64 hla bơar pơm tơngla tĕh bơih. Mă lei, gô ĭnh pơgơ̆r hop akŏm lăng hơlen dơ̆ng ‘mơ̆i ‘nŏh mă tơroi tơbăt hơdăh. Tơdrong iŏk tơvĭh au mơmat tat tơpă mơ̆n . Dang ei lăp atŏk kơtang bơ̆ jang chă pơrô̆ pơrôp vă kon pơlei năm ba ăn dơ̆ng, pă đei trong ayơ bơih.”

        Ƀơm trŭh tơdrong ƀơk ăn glăi 65 hlak Hla bơar pơm tơngla tĕh tơ̆ tơring Dak Som păng lơ tơdrong pơm glăi lơ̆m tơdrong groi tĕh tơ̆ apŭng Dak Glong, ƀơk Ngô Thanh Danh, Bí thư Đảng dêh char Dak Nông tơbăt, lơ̆m khei năr kơnh gô xek tơlang kơhret dôm bơngai pơm glăi au.  

Bơngai chĭh: Tuấn Long

Tơblơ̆ nơ̆r: Amazưt