VOV4.Bahnar - Đơ̆ng rŏng kơ Tết Nguyên đán truh dang ei, tơ̆ Dak Nông đei vă jê̆ 1000 ‘nu thây kô păng hŏk tro jĭ covid-19. Mă lei dang ei anih pơ tho pơ hrăm dêh char âu oei vei lăng ‘lơ̆ng rim tơ drong vă hŏk tro jăl 2, jăl 3 hơ nơ̆ng năm hŏk tơ̆ hnam trưng.

Hŏk tro đơ̆ng lăm 6 tŏk tơ̆ kơ pal tơ̆ Dak Nông oei hơ nơ̆ng năm hŏk tơ̆ hnam trưng

Kiơ̆ kơ sô̆ chih jô̆ đơ̆ng Anih vei lăng pơ tho pơ hrăm dêh char Dak Nông, đơ̆ng năr hŏk tro năm hŏk dơ̆ng tơ̆ hnam trưng đơ̆ng rŏng kơ pơ dơ̆h Tết truh dang ei, lơ̆m dêh char đei 132 ‘nu thây kô păng hlŏh 800 ‘nu hŏk tro jĭ covid-19. Yoa kơ sô̆ bơ ngai jĭ mă lơ ‘nŏh tơ̆ jăl 1 păng mâm non, kơ na Dak Nông asong ăn jăl mâm non păng jăl 1 lơ̆m dêh char pơ dơ̆h năm hŏk tơ̆ hnam trưng klĕp truh đei nơ̆r pơ tho plơ̆ng dơ̆ng; pơih trong pơ tho hŏk online, hŏk lơ̆m tivi păng thây kô năm ƀơk ƀai vă pơm.

Dôm jăl hŏk THCS păng THPT oei pơ gơ̆r pơ tho hŏk kơ tă đĕch, păng lăp dôm lăm krê tơ pŏh jĭ đech ăn pơ tho hŏk trư̆k tuyê̆n. Ƀok Nguyễn Văn Toàn, Kơ dră chĕp kơ̆l Anih vei lăng pơ tho pơ hrăm dêh char Dak Nông ăn tơ băt, Anih oei pơ tho ăn rim anih pơ tho pơ hrăm pơm kiơ̆ mă ‘lơ̆ng dôm trong jang tang găn jĭ, ưh gơ̆h lăng pơ hơi mă lei ưh gơ̆h hli tăr văr ‘năi. Dang ei dêh char oei vei lăng ‘lơ̆ng rim tơ drong ăn hŏk tro đơ̆ng lăm 6 năm hŏk tơ̆ hnam trưng.

Dơ̆ng: Tơ blơ̆