Dơnâu Tà Đùng – dơnâu đak hnam kơmăi unh hơyuh Đồng Nai 3, tơ̆ apŭng Đăk Glong, dêh char Đăk Nông, jing tơring erih xa kơ hrĕng unh hnam kon pơlei erih hăm tơdrong jang rong ka hơdrau, rôp ka tơ̆ dơnâu đak păng chơ 'nhăk tơmoi chă tơmang hăm thŏng. Tơ̆ dơnâu đak dang ei đei 6 anih rong ka, rim anih akŏm pơhlom 4 - 5 unh hnam.

Đei khul kơpal tơroi tơbăt, pơtho pơm kiơ̆ tơnăp dôm tơchơ̆t vei xơđơ̆ng vă tang găn xar bar glơ̆k tơ̆ đak, vei rơgoh cham char păng vei lăng bri, ƀok Bùi Văn Điệp, bơngai rong ka hơdrau tơ̆ dơnâu Tà Đùng lơ̆m 3 xơnăm kơ âu tơroi:  Rong kon tơrong adrol hloh noh ba athei vei rơgoh cham char, rim tơdrong athei vei mă rơgoh. Oei xơđơ̆ng trong nơnăm noh duh athei vei kơjăp, pơtih nhen hrŭk ao phao, hli đei tơdrong kiơ noh adoi hiôk ăn kơdih po. Oei găh bri noh tơ̆ âu đe adoi tơroi tơbăt hơnơ̆ng đĕch, ba duh nĕ chă koh 'lơ̆ng, kơlih âu jing bri tơm kơ teh đak, anih vei răk tơƀăk mong.

Atŭm hăm 6 anih rong ka hơdrau, dơnâu Tà Đùng oei đei 3 dơnŏk dơ̆ng ăn thŏng plŭng chih măt pơm jang vă 'nhăk tơmoi chă tơmang. Anih jang vei xơđơ̆ng trong nơnăm dêh char Đăk Nông hlôi tơlĕch hơlen chih măt, pơkăp hơlen thŏng plŭng, dôm kơmăi kơmŏk vei xơđơ̆ng nhen ao phao, phao tơgŭm xar bar, dŏng glơ̆k, tơmam drăm 'măn pĭt unh xa 'nâu nai hia. Ƀok Trần Quốc Long, Kơdră kŏng ti jang tơmang pơhiơ̆ tơ̆ âu ăn tơbăt:  Dôm bơngai jang vơ̆r thŏng, plŭng duk nhôn hlôi axong năm hŏk pơrăm, đei axong chư̆ng chih pơkăp hăm bơngai vơ̆r thŏng plŭng duk vă chơ tơmoi chă tơmoi. Păng dôm bơngai jang hlôi đei năm pơhrăm găh tơmang pơhiơ̆ kơyuơ Anih Joh ayŏ Tơplŏng kơdâu păng Tơmang pơhiơ̆ Đăk Nông pơih pơtho. Nhôn duh 'meh vă Anih vei lăng kon pơlei dêh char păng rim anih jang kơpal pơm trong hiôk ăn dôm anih jang mŭk drăm lơ̆m tơring Tà Đùng noh pơih đei lăm hŏk chư̆ng chih ăn bơngai jang lơ̆m thŏng, plŭng duk vă rim bơngai gơh tơrĕk păng hơtŏk tơdrong hlôh vao vă jong ăn tơmoi truh tơmang.

Kiơ̆ tơdrong hơlen đơ̆ng anih jang kơpal, tơ̆ dơnâu Tà Đùng – hnam kơmăi unh hơyuh Đồng Nai 3 păng 4 (apŭng Đăk Glong) đei 34 tong duk tơmang pơhiơ̆, thŏng păng plŭng kơmăi tŏk bŏk oei pơm jang. Đơ̆ng chă hơlen, khul jang kơpal ƀôh đei minh anih jang mŭk drăm đei 4 tong duk chơ tơmang adoi đĭ khei năr pơkăp yua. 'Nguaih kơ noh, oei đei lơ duk, thŏng tam mă chih măt kiơ̆ pơkăp. Kiơ̆ kơ ƀok Lê Đình Hải, Phŏ Kơdră Anih vei lăng duk, thŏng, plŭng păng bơngai vơ̆r – Anih jang găh trong nơnăm Đăk Nông, âu jing tơdrong pơngơ̆t hăm tơring ƀơ̆t mă lơ duk, thŏng, plŭng noh adoi bơ̆ kơdih, ưh kơ đei tôm pơkăp vă chih măt nhen tơchơ̆t: Anih jang găh trong nơnăm duh hơnơ̆ng jang hadoi hăm dôm anih jang kơpal đei tơrĕk hơtŏk tơdrong tơroi tơbăt, pơgơ̆r chă hơvơn kon pơlei hơmet dôm duk, thŏng, plŭng mă ƀlep pơkăp vă chă chih măt tơchơ̆t, chih măt pơm jang kiơ̆ trŏ tơchơ̆t. Atŭm hăm noh, anih jang chih hơlen pơkăp noh Anih jang chih pơkăp kơsô̆ 5 tơ̆ Nha Trang adoi jang hadoi tơnăp hăm tơring, hơnơ̆ng pơtho kon pơlei mă lei dôm tong duk, thŏng, plŭng âu noh kơdih chă bơ̆ pơjing kiơ̆ tơdrong hlôh vao juăt xo, ưh đei hla bar hơdăh noh ưh kơ trŏ pơkăp vă chih tơbang kiơ̆ tơchơ̆t.

Atŭm hăm tơdrong pơtho kon pơlei pơm kiơ̆ chih măt duk thŏng plŭng kiơ̆ tơchơ̆t, axong ao phao ăn dôm unh hnam rong ka hơdrau păng erih jang xa ăh joh dơnâu đak, rim anih jang kơpal tơ̆ Đăk Nông duh hơnơ̆ng hơlen, tơroi tơbăt vei xơđơ̆ng ăn dôm tơdrong jang vih vơ̆t tơ̆ dơnâu Tà Đùng. KIơ̆ kơ noh, pơkăl tơ-'ngla duk, plŭng, thŏng tơmang pơhiơ̆ ưh đei chơ trăp hloh pơkă, hloh kơsô̆ bơngai pơkăp; dơ̆ng duk, thŏng, plŭng trŏ anih pơkăp; pơkăl tơmoi hrŭk ao phao ƀơ̆t vih vơ̆t tơ̆ dơnâu đak.

Đei lăng jing Ving Hạ Long tơ̆ kông kơ Tây Nguyên, mă lei tơdrong jang tơmang pơhiơ̆ tơ̆ Dơnâu Tà Đùng adoi oei nhar nhen xo đĕch. Mă truh dang ei tam mă ƀơm xar bar yơ hiơ̆r kơ đon, tơmang pơhiơ̆ Tà Đùng kăl pơgơ̆r vei hơlen kơjăp păng tơnăp hloh vă vei xơđơ̆ng ‘lơ̆ng ăn tơmoi truh tơmang.

Adrol kơ Têt nguyên đán Quý Mão, Thủ tướng teh đak hlôi pơtrruh hla bar pơkăp găh vei xơđơ̆ng trong nơnăm lơ̆m pơyan Têt. Lơ̆m noh, Thủ tướng teh đak bơ̆n pơkăl, rim tơring hơtŏk hơlen, xek tơlang kơjăp dôm tơdrong pơm glăi tơchơ̆t vei xơđơ̆ng trong nơnăm tơ̆ teh, trong gre treng, trong đak. Xek tơlang kơjăp dôm bơngai ưh đei hrŭk ao phao ƀơ̆t hao thŏng, vih vơ̆t kiơ̆ trong đak; thŏng plŭng chơ bơngai mă ưh đei tôm dŏng tơgŭm xar bar, bơngai vơ̆r thŏng mă ưh đei ƀăng, ưh đei hla bar axong vơ̆r, chư̆ng chih juăt jang trŏ ƀlep... Hơlen tơdrong pơm kiơ̆ tơchơ̆t đơ̆ng khôi lươ̆t găh vei xơđơ̆ng trong nơnăm tơ̆ anih pơdơh jơ̆ng jih đak krong, anih dơ̆ng iŏk chơ tơmoi truh tơmang, dôm jăl trong tơ̆ đak, mă hăt noh dôm anih chơ tơmoi đơ̆ng kông năm tơ̆ achon teh, dôm jăl trong tơ̆ đak krong păng tơring đak đei pơgơ̆r lêh akŏm âu to.