'Mi kial đak hơbông tơ̆ tơring Hơlĕch dêh char Đăk Lăk tŏk bŏk oei ƀôh hli hlơt ah mă 'mi tih đunh năr tơ̆ lơ tơring, lơ̆m kơplah noh rim hnam kơmăi unh hơyuh adoi chă pơih pơro đak jur tơ̆ tơring klŭng. Chă dăr lăng tơdrong jang ming hơmet tơ̆ dôm xah gah Tu ah kơsơ̆ năr 19/11, Phŏ Thủ tướng Hồ Quốc Dũng pơgơ̆r hăm rim khul jang dah tenh kuăng yông 'nhăk kon pơlei hơdrol 'năr kơmăng, pơkăp tơdrong tơgŭm dŏng kon pơlei noh hơdrol hloh. Đak Krong Pa păng đak krong tơ̆ tơring gah Tu Đăk Lăk hlôi tŏk blai krưp hloh pơtêng hăm đak hơbông ah sơnăm 1993.

Jăl trong 1A păng lơ jăl trong tơm tih nai ƀơm tơklah hloi, pơm tơnap tap ăn tơdrong tơgŭm dŏng. 'Mi tih pơtoi pơdui đunh pơm ăn đak tŏk blai tenh hloh tơ̆ dôm tơring rok kiơ̆ đak krong Tam Giang, Sông Cái, đak Krong Pa păng đak krong Bàn Thạch, pơjuă hli hlơt hăm tơdrong hơrih kơ rơbou unh hnam kon pơlei. Dôm khul jang athei kơchăng tơlĕch trong vă vei sơđơ̆ng tơdrong hơrih păng mŭk drăm kon pơlei.

Gơmăng năr 19/11, Khánh Hòa hơnơ̆ng đei ‘mi tih. Lơ tơring đak lip kơtang; đak tơ̆ rim đak kroong tŏk kơtang, hơmơt tơdrong teh tơdrŭt hơlih jĭ tôch kơtang. Tơ̆ hơnăp ‘mi kial kơtang, Khul kơdră chĕp pơgơ̆r Đảng dêh char Khánh Hòa tơlĕch nơ̆r tơbăt tĕnh koăng, athei rim khul akŏm iung jang tang găn hơlou, pơm sơđơ̆ng dơ̆ng kơjăp ăn kon pơlei. Kiơ̆ tơbăt, pơgê năr 20/11, ‘mi tih oei hơnơ̆ng, đak ro mơ̆t kơtang pơm ăn đak lip tôch kơtang. Lơ̆m 48 jơ truh ou kơnh, lơ̆m dêh char gô đei răm ‘mi tih hloh dơ̆ng; đak hơbông tơ̆ rim đak kroong nhen đak kroong Cái Nha Trang, đak kroong Cái Phan Rang, đak kroong Dinh (Ninh Hòa)… hơnơ̆ng tŏk tĕnh koăng. Khul kơdră chĕp pơgơ̆r Đảng dêh char athei Hơnih chĕp pơgơ̆r Tang găn hơlou dêh char hăm khul bơ̆ jang tơlĕch ăn lơ gre kmăi kmŏk, tĕnh koăng yông kon pơlei lĕch veh đơ̆ng tơring hli hlơt hloh.

Kơmăng năr 19/11, Gia Lai ƀơm răm kơtang hloh đơ̆ng đak hơbông, hơdrô̆ lơ̆m minh năr đei 3 'nu bơngai lôch; hloh 10.400 unh hnam ƀơm đak lip păng tơklah hloi. Hăm tơdrong hăt hot ou, Kơdră Anih jang vei lăng kon pơlei dêh char Gia Lai Phạm Anh Tuấn pơgơ̆r hăm khul kŏng an, khul linh păng jơnŭm pơgơ̆r tơring dah kơchăng yông 'nhăk kon pơlei truh oei anih sơđơ̆ng. Khul kŏng an hlôi 'nhăk hloh 3.000 'nu bơngai, dŏng đei 184 'nu bơngai lĕch đơ̆ng tơring đak lip jrŭ. Tơ̆ dôm tơring nhen Ia Tul, Ia Pa, Pờ Tó, Ia Rsai, Uar…, khul jang tơgŭm dŏng athei yua thŏng ca nô, tơlei tŏng, phŏ noh lŏt đak blai vă năm truh rim unh hnam ƀơm tơklah. Rok kiơ̆ đak krong Pa, kơhrĕng unh hnam kon pơlei tơ̆ dôm pơlei pơla hlôi đei 'nhăk truh hơnih oei sơđơ̆ng.

Adoi lơ̆m kơmăng 19/11, tơ̆ trong krang Mimosa, lơ̆m tơring teh kơ phương Xuân Hương – Đà Lạt, dêh char Lâm Đồng đei minh hơnih hơlih hli hlơt. Tôm drơh trong hơlih đĭ đăng hloi. Hăm tơdrong hli hlơt ou, khul jang tơgŭm dŏng kơ Khul kŏng an dêh char Lâm Đồng hlôi akŏm jang măng năr năm truh hơnih hơlih hli hlơt, vă chă tơgŭm dŏng păng yông 'nhăk sơđơ̆ng 12 măt kon pơlei lĕch đơ̆ng hơnih hli hlơt.