Dơ̆ng ăh hơbong hơdroong var pơbe hăm hloh 20 tŏ, ƀok Quách Thiện, thôn Đăk Rmo, xăh Đăk Ndrung, apŭng Đăk Song, dêh char Đăk Nông chơt hơ iă ăn tơbăt, rong bơbe hlôi tơgŭm unh hnam ƀok đei yua kăp gĭt.

Unh hnam ƀok truh oei tơ̆ tơring erih jang xa đơ̆ng xơnăm 2006 mă lei kơlih đei lơ kon hơ ioh păng ưh măh teh choh jang noh oei hin dơnuh hơnơ̆ng đĕch. Blŭng xơnăm 2020, ƀôh tơdrong erih unh hnam ƀok, đe đảng viên lơ̆m thôn păng xăh hlôi tơgŭm ăn unh hnam ƀok 4 tŏ bơbe yŏng, atŭm hăm noh tơgŭm ƀok bơ̆ hơdroong var, pơtho găh trong rong kon tơrong, tang găn pơrang jĭ vă hơtŏk iŏk yua. Khul bơbe vơ̆ pran chêk lar tenh kuăng, kơtă lơ̆m xơnăm mă blŭng hlôi pơyua ăn kơ ƀok hloh 10 rơtuh hlj păng xơnăm âu noh jê̆ 50 rơtuh hlj. Atŭm hăm noh, đe đảng viên tơ̆ xăh, apŭng duh hlôi tơgŭm vă ƀok Thiện mơ̆t jang tơ̆ kŏng ti choh jang xa lơ̆m tơring. Gơnơm đơ̆ng noh, tơdrong erih kơ unh hnam ƀok hlôi dar deh xơđơ̆ng, jê̆ klaih đơ̆ng hin dơnuh: “Bơbe noh adoi xa hla, xa đơ̆k păng ‘nhĕt đĕch. Khul bơbe vơ̆ pran ‘lơ̆ng, dôm kon tih noh duh chông kon vă pơm yŏng. Adoi pôm bơnê kơ dôm jăl pơgơ̆r tơring hlôi tơgŭm ăn unh hnam da ƀiơ̆ tơnap tap hloh”

Tơgŭm unh hnam ƀok Quách Thiện jing khul 5 đảng viên đei hloi tơ̆ chi ƀô̆ thôn, tơ̆ anih jang đảng xăh păng anih kơpal apŭng. Ƀok Lương Quốc Lam, Ƀĭ thư chi ƀô̆ thôn Đăk Rmo ăn tơbăt, atŭm hăm unh hnam ƀok Quách Thiện, hlôi đei dơ̆ng 4 unh hnam hin dơnuh lơ̆m thôn đei tơgŭm đơ̆ng tơdrong jang “5 đảng viên tơgŭm 1 unh hnam klaih đơ̆ng hin dơnuh” păng 3 lơ̆m kơsô̆ noh hlôi klaih đơ̆ng hin dơnuh. Kơdih po ƀok Lam duh vang jang tơgŭm unh hnam ƀok Quách Thiện ƀôh hơdăh, hăm tơdrong hơlen hơdăh tơdrong đei ƀôh, tơdrong erih duh nhen tơdrong kăl, hơpơi ‘moih đơ̆ng unh hnam hin dơnuh, dôm trong jang tơgŭm kăp gĭt đei jơnei tơnăp: “Unh hnam hin dơnuh mă lơ noh ưh kơ băt hơdăh trong jang xa, jene jang păng kơmăi kơmŏk pơm jang. Lơ̆m dôm xơnăm kơ âu, Chi ƀô̆ păng dôm anih jang adoi jang tơnăp pơkăp “5 đảng viên tơgŭm 1 unh hnam klaih đơ̆ng hin dơnuh”, ƀôh đei jơnei tơnăp. Đei tơgŭm, pơm trong ăn tơdrong jang xa đe xư klaih đơ̆ng hin dơnuh kơjăp xơđơ̆ng”.

Yă Vương Thị Hiền, Phŏ kơdră Anih jang Măt trâ̆n tôh kuôk xăh Đăk Ndrung, apŭng Đăk Song, dêh char Đăk Nông ăn tơbăt, đơ̆ng rŏng hloh 2 xơnăm tơlĕch jang, tơdrong jang “5 đảng viên tơgŭm 1 unh hnam hin dơnuh” đei jơnei tơnăp lơ̆m tơring. Dang ei lơ̆m xăh tŏk bŏk đei 52 unh hnam hin dơnuh đei đe đảng viên tơgŭm. Hăm tơdrong vang jang đơ̆ng đe đảng viên tơ̆ lơ jăl jang, đơ̆ng thôn truh tơ̆ xăh, apŭng, atŭm hăm tơdrong vang jang đơ̆ng dôm anih jang mŭk drăm, anih jang 'mêm bơnat noh jơhngơ̆m jang tơgŭm ăn unh hnam hin dơnuh jing dơnơm. Rim đảng viên ưh adrô̆ tơgŭm axong hơdrĕch 'long pơtăm, kon yŏng, trong choh jang rong kon tơrong mă oei hơlen kơjăp anih tĕch tơlĕch ƀơ̆t unh hnam hin dơnuh pơm tơlĕch tơmam drăm. Rim unh hnam hin dơnuh đei tơƀôh trong pơm jang, đei jơhngơ̆m pran găh mŭk drăm đon bơnôh vă hơtŏk pơm jang. Xăh duh xơkơ̆t tơgŭm gĭt kăl hloh, tơgŭm unh hnam hin dơnuh klaih đơ̆ng hin dơnuh kơjăp xơđơ̆ng noh ưh đei kơdâu kiơ̆ kơsô̆ pơkăp, akŏm lơ̆m tơdrong 'lơ̆ng: “Tơpă tơdrong erih kơ kon pơlei ƀơm lơ tơnap tap, đe xư kơƀăh lơ tơdrong noh tơdrong hlôh vao dăh mă kơdâu kiơ̆ kơsô̆ mă akŏm lơ̆m tơdrong 'lơ̆ng. Kơlih minh unh hnam hin dơnuh noh ba athei tơgŭm lơ tơdrong, ưh kơsĭ adrô̆ tơgŭm đe xư klaih đơ̆ng hin dơnuh ôh. Vă tang găn tơdrong hin dơnuh hơlơ̆k dơ̆ng noh tơring athei xơkơ̆t hlôi tơgŭm kăp gĭt, tơgŭm lơ tơdrong vă đe xư klaih đơ̆ng hin dơnuh tơpă”

Hăm tơdrong atŭm jơhngơ̆m đơ̆ng dôm jăl jang, mă kăl noh tơdrong vang jang đơ̆ng đe đảng viên kiơ̆ tơdrong pơkăp jang “5 đảng viên tơgŭm 1 unh hnam hin dơnuh”, lơ unh hnam hin dơnuh tơ̆ xăh Đăk Ndrung pơma adrô̆. apŭng Đăk Song pơma atŭm hlôi hơtŏk, tơdrong erih dar deh đei xơđơ̆ng. Tơdrong mă âu duh ăn ƀôh, apŭng Đăk Song hlôi xơkơ̆t trŏ trong jang păng hơyak trŏ pơkăp ăh hŏk hơlen păng pơm kiơ̆ đon bơnôh, trong pơm jang đơ̆ng ƀok Hồ Chí Minh lơ̆m tơdrong jang xut lê̆ pơngot, tơjur hin dơnuh.