Ŭnh hnam mŏ Y Hiền oei lơ̆m pơlei Kon Vơng Kia, tơring Măng Đen adoi nhen lơ ŭnh hnam anai, tơdrong hơrih sa sơ̆ jĭ gơnang lơ̆m ƀar pêng sao chŭn na, khei năr vă truh pơyan kĕch yoă hơnơ̆ng pơngơ̆t truh tơdrong ưh kơ măh phe sa ƀa sŏng. Kang ƀô̆, đang viên yak truh rim hnam pơtho ăn trong jang rei pơtăm ‘nhot rơgoh, vei lăng năng tông ‘long pơtăm, vang iung jang lơ̆m rim trong jang hơdoi roi năr roi pơm tơplih jơhngơ̆m đon tơchĕng kơ mŏ. Đơ̆ng mă pơtăm vă kơ sa, mŏ Y Hiền hlôi tơplih jing pơtăm vă kơ tĕch păng vang iung jang tơmang pơhiơ̆ pơlei pơla:“Gơnơm đei thôn trưởng, Bí thư Chi ƀô̆ pơtho pơtăm chehphe, đơ̆ng noh jei vang jang hơdoi pơtăm ‘nhot, đơ̆ng noh ŭnh hnam mă đei ƀôh ƀiơ̆”.

Tơ̆ Kon Vơng Kia, tơdrong tơplih ưh khan kiơ̆ trong “mĭnh bruh” mă lei roi năr roi lang să. Mưh ƀôh bơngai tơpă, jang tơpă, đei iŏk yoa tơpă, kon pơlei roi năr roi lui păng jang kiơ̆. Lơ̆m pơbŭng hnam ‘nao, dôm tơdrong pơgơ̆r kơ̆m kang joăt joe sơ̆ ki oei vei răk hơnơ̆ng. 

Dang ei pơlei Kon Vơng Kia đei 3 khul tôn ching chêng hăm hloh 90 ‘nu bơngai, lơ̆m ou đei mĭnh khul đe hơ ioh đei 31 ‘nu. Rim lăm pơtho đei chă pơtho ăn đĕch, kơ yuơ rim bơngai đang viên pơtho. Chĭng chêng ưh khan lăp “vei răk vă kơ ƀlŏk” mă oei “vei răk vă hơrih”. Dôm gơmăng hơtuch giĕng, jơva ching chêng hlôi jing tơmam pơvih pơvăn ăn tơmang pơhiơ̆, hơnhăk đei iŏk yoa kơjăp ăn kon pơlei. Đơ̆ng noh, mĭnh khul kon pơlei choh jang sa ‘nao đei jing- dôm bơngai jang tơmang pơhiơ̆.

Đảng viên A Đruông (37 sơnăm) bơngai mă blŭng tĕch tŏ sĕt teh vă pơjing homestay đei ‘măng pơm ăn lơ bơngai pơma tơ̆ ou tơ̆ to, kơ yuơ ‘nhŏng hlôi đei ‘măng jang sa ưh kơ lĕch đơ̆ng pơtăm chehphe, tŏk bŏk oei hre đom. Pơbŭng hnam pơtăm đei ming hơmet jing hơnih pơdơ̆h jơ̆ng, oei vei kơjăp tơdrong oei sa nhen sơ̆ ki kơ ŭnh hnam. Lơ̆m hnam đei 8 hơmrŭk ching chêng hăm 22 tŏ chĭng chêng hơtol hơmet pơ ‘lơ̆ng vă tơroi tơbăt găh tơdrong oei sa joăt joe đơ̆ng kơ dih. ‘Nhŏng A Đruông tơroi, jang tơmang pơhiơ̆ ưh khan lăp mơdro sa mă oei vei răk tơdrong jang, vei lăng pơlei pơla:“Đảng viên ưh kơ hli tơdrong đe chă pơma ou to găh tơdrong jang sa ưh kơ lĕch. Bơ̆n hơdrin jang, đang viên jĭ kăl pơm juk yuk trong hơlou vă kon pơlei ƀôh. Ăp pơm jŭk yuk trong hơlou ‘noh bơ̆n pơma kon pơlei mă yom. Đảng viên jei iŏk vei lăng rim khul ŭnh hnam. Minh ‘nu đang viên iŏk vei lăng 4 ŭnh hnam. Lơ̆m khul ŭnh hnam ou, dang ei đei ƀôh ngăl. Ƀar ŭnh hnam ‘noh bơngai kră, pă ƀar ŭnh hnam to ‘noh ŭnh hnam mơlôh. Rim ŭnh hnam hơmet pơm homestay ou. Dôm bơngai lơ̆m khul unh hnam roi năr roi băt hlôh ƀôh hơdăh jang kiơ̆ tôch tơnăp”.

Dang ei lơ̆m pơlei  Kon Vơng Kia đei 8 ŭnh hnam pơm homestay, tơƀôh hơdăh pơlei Kon Vơng Kia tŏk bŏk yak kiơ̆ trong jang sa ‘nao. Mă lei, vă tơdrong jang tơmang pơhiơ̆ đei jing tơdrong jang sa tơm kơjăp ‘lơ̆ng păng vei răk dôm tơdrong oei sa joăt sơ̆ ki, hơnăp jang kơ đảng viên ưh khan lăp “Pơm hơdrol” mă oei jing bơngai yak hơdoi đunh đai tai sơnăm. Mĭnh ‘nu đảng viên iŏk vei lăng 4 truh 5 ŭnh hnam, pơtho hloi trong jang sa, adoi lăng hơlen, hơmet pơ ‘lơ̆ng tơnap tap. Trong jang tơjê̆ hăm kon pơlei, tơklep hăm kon pơlei tơgŭm ăn trong bơ̆ jang đơ̆ng kơpal hoei “kơtĕch toch broch”.

Ŭnh hnam ‘nhŏng A Hùng, Thôn trơng Kon Vơng Kia, tơring Măng Đen hlôi pơjing 2 homestay hăm akŏp kon jên kơ hrĕng triu hlak jên, lơ̆m ou đei kon jên tŏk iŏk đơ̆ng hơnih mong jên. ‘Nhŏng A Hùng tơbăt, sơ̆ lơ hơdruh tơdăm ‘nhoen mơ̆t Đảng, mă lei mưh vang hop akŏm, đei băt hodăh lơ tơdrong kơtơ̆ng ang, hŏk kiơ̆ trong jang sa, roi năr đe sư roi tơplih jơhngơ̆m đon:“Hăm đe hơdruh tơdăm gơh hơgei oei sa ‘lơ̆ng, Chi ƀô̆ gô pơjing rơvơn ăn vang hop akŏm atŭm hăm đang viên. Đơ̆ng noh đe sư hŏk pơhrăm, băt hlôh hloh dơ̆ng găh Đảng păng băt hơdăh lơ trong jang tơgŭm djru găh atŏk tơ iung mŭk drăm-tơpôl. Roi năr, dôm hơdruh tơdăm ‘noh hlôi băt hlôh ƀôh hơdăh găh Đảng, ‘meh vă mơ̆t Đảng hloi”.

Lơ pơlei tơ̆ tơring Măng Đen tŏk bŏk pơchoh trong tơmang pơhiơ̆ pơlei pơla tơklep hăm tơdrong oei sa joăt joe sơ̆ ki păng choh jang sa kmăi kmŏk hơgei. Đơ̆ng mĭnh tơring dơnuh, rim pơlei pơla tơ̆ Măng Đen tŏk bŏk tơplih hơ iă. Lơ̆m tơring Măng Đen đei 48 khul Đảng hăm hloh 800 ‘nu đang viên. Đang ƀô̆ tơring sơkơ̆t hơdăh tơ iung pơjing rim khul pran kơjăp, atŏk tơ iung đang viên lơ păng ‘lơ̆ng, măt bơngai đang viên rim sơnăm tŏk 3-4%. Ƀok Nguyễn Ngọc Sơn, Kơ iĕng Ƀĭ thư Đảng tơring Măng Đen tơbăt, kăl pơm hơtŏk pơgơ̆r hop akŏm chi ƀô̆ ‘lơ̆ng trŏ lăp păng hơnăp jang tơnăp: “Tơdrong yă kiơ tơnap đei kang ƀô̆, đang viên yak hơdrol”. Kiơ̆ đơ̆ng ƀok Nguyễn Ngọc Sơn, mưh đang viên tơpă pơm jŭk yŭk trong hơlou, nơ̆r pơma tơ-‘ngla iung jang hloi, jang băt păng iŏk đei jơnei ‘noh kon pơlei mă lui păng pơm kiơ̆: “Sơkơ̆t hơdăh bơ̆ jang tơ iung pơjing khul Đảng, đảng viên ‘noh Đảng ƀô̆ tơring jei tơdrong tơchơ̆t, pơjao tơdrong jang ăn khul Đảng, atŏk tơ iung đang viên lơ̆m jăl jang, rim sơnăm. Đang ƀô̆ tơring atok tơ iung pran kơjăp vă chĕp pơgơ̆r tơdrong jang chinh trĭ tơ̆ pơlei, pơm hơtŏk jơhngơ̆m chĕp pơgơ̆r ‘lơ̆ng hơ iă tôm tong tơ̆ pơlei. Kang ƀô̆ đang viên kăl pơm jŭk yŭk trong hơlou, jang tơnăp ‘lơ̆ng vă kon pơlei kiơ̆ yok rok jơ̆ng. Khul kang ƀô̆ tơ̆ tơring jei hlôi đei rơih tôch hơlen, rim kang ƀô̆ ou ‘lơ̆ng, tơnăp, hơbĕch hơbal dôm tơdrong jang tơ̆ pơlei, bơ̆ jang tôch kơ ‘lơ̆ng”.