Kiơ̆ kơ yă Nguyễn Thụy Phương Hiếu, Phŏ Kơdră pơgơ̆r Anih vei lăng Joh ayŏ - Tơplŏng kơdâu păng tơmang lăng Dak Lak, ‘nâu jĭ tơdrong bơ̆ jang lơ̆m tơdrong jang tơbôl joh ayŏ kơ dêh char Dak Lak sơnăm 2022. ‘Măng bơ̆ jang ƀlep ƀơ̆t tơbăt 60 sơnăm pơjing tơdrong pơvei jang tơbôl Việt Nam – Lào, 45 sơnăm jang hơdai tơbôl Việt Nam – Lào păng đei pơgơ̆r ƀlep ƀơ̆t tơbăt 47 sơnăm năr quốc khánh teh đak buăl Lào ‘năr 2/12.

Lơ̆m jơ năr năm bơ̆ jang, 2 păh hlôi pơma đam, pơma dơnuh găh tơdrong jang hơdai hơtŏk tơiung joh ayŏ păng tơmang lăng. Drơ̆ng nơ̆r kĭ pơkăp hla ar chih tơƀlŏk đơ̆ng 2 anih jang kơ 2 dêh char găh tơdrong jang hơdai, tơgŭm băl lơ̆m tơdrong tơklep hơdai đơ̆ng joh ayŏ păng tơ mang lăng lơ̆m khei ‘năr đơ̆ng dang ei truh sơnăm 2025.

Kiơ̆ tơdrong kĭ pơkăp, 2 păh gô pơlơh băl bơ̆ jang tơbôl joh ayŏ, ăn khŭl joh ayŏ kơdŏ soang kơ dêh char năm tơ̆ dêh char buăl vă hơri hơsoang kŭm nhen tơlĕch jang hơlen lăng tơgoăt tơmang lăng đơ̆ng anih jang mơdro sa hăm dôm hơ nih tơmang lăng tơ̆ 2 dêh char. Hơdai hăm, hơnhăk tơdrong ‘lơ̆ng hơ iă joh ayŏ kơ 2 dêh char tơ̆ dêh char buăl vă tơƀơ̆p băl, roi tơƀôh.