VOV4.Bahnar - Pơgê năr 2/3, tơ̆ pơlei tơm Kon Tum, Dơnŏ anih vei lăng kon pơlei dêh char Kon Tum hăm Dơnŏ anĭh chĕp pơgơ̆r dêh char Attapư (Lào) hlôi pơgơ̆r bơ̆ jang, drơ̆ng mĭnh nơ̆r bơ̆ jang hơdoi pơgơ̆r pơhrăm tơgŭm dŏng mư̆h đei đak lok jrŏh, ‘mi kial hơbŭt hơbông păng tĕh tơdrŭt hơlĭh pơrăm ƀơm kơnê̆ trŭh kon pơlei oei tơ̆ tơring sơlam tĕh đak kơ ƀar dêh char.

Rup hop akŏm

Iung pơma tơ̆ jơ bơ̆ jang, ƀok Nguyễn Hữu Tháp, Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Kon Tum păng ƀok Bun-Sợt Sệt-thi-lạt, Kơ iĕng Kơdră chĕp pơgơ̆r dêh char Attapư tơroi tơbăt găh tơdrong jang atŏk tơ iung mŭk drăm-tơpôl kơ ƀar dêh char păng tơdrong đei răm đơ̆ng tŏ ‘mi kial, phang pơđang pơrăm lơ̆m sơnăm au ki. Tơ̆ jơ bơ̆ jang, ƀar păh drơ̆ng mĭnh nơ̆r păng kĭ pơkăp hla bơar ƀlŏk hơdơ̆r jang hơdoi tơlĕch jang kiơ̆ jơnei Tơdrong Tơchơ̆t kơthơ găh tơgum dŏng hơmet pơ ‘lơ̆ng đơ̆ng tŏ ‘mi kial pơrăm ƀar păh dêh char. Lơ̆m sơnăm 2022 hloi, ƀar dêh char Kon Tum păng Attapư gô iung jang hơdoi pơgơ̆r pơhrăm bơ̆ jang tơgŭm dŏng đak lŏk jrŏh, đak hơbông păng tĕh tơdrŭt hơlĭh pơrăm tơ̆ tơring sơlam tĕh đak kơ ƀar dêh char. Hơnĭh pơgơ̆r tơ tơring Pơ Y, apŭng Ngọc Hồi, dêh char Kon Tum.

Tơblơ̆ nơ̆r: Amazưt