Jang kiơ̆ Drơ̆ng mĭnh nơ̆r trong jang hơdoi ƀar păh Khŭl kơdră chĕp pơgơ̆r 2 tĕh đak Việt Nam- Lào, pơgê năr 26/10 tơ̆ pơlei tơm Kon Tum hlôi pơgơ̆r pơm Lêh kĭ pơkăp Hla bơar ƀlok hơdơ̆r găh jang hơdoi ƀar păh Dơnŏ anĭh vei lăng kon pơlei dêh char Kon Tum hăm Khŭl kơdră dêh char Attapư, tĕh đak CHDCND Lào jăl jang 2022- 2027.

Rup jơ bơ̆ jang

Iung pơma tơ̆ Pơm lêh kĭ pơkăp hla bơar blŏk hơdơ̆r găh jang hơdoi ƀar păh tơring, ƀok Dương Văn Trang, Kơdră jang lơ̆m Trung ương Đảng, Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Kon Tum hăm ƀok Lệt Xay-nhạ-phon, Kơdră jang lơ̆m Trung ương Đảng Kon pơlei kĕch mang Lào, Bí thư Đảng dêh char, Kơdră chĕp pơgơ̆r dêh char Attapư hôn bơnê kơtang dôm tơdrong iŏk đei jơnei lơ̆m jang hơdoi ƀar păh dêh char khei năr au ki, adoi sơkơ̆t hơdăh hơnơ̆ng atŏk kơtang, hơmet pơ ‘lơ̆ng, atŏk tơ iung tơgoăt tơgoăl ‘lơ̆ng liĕm, jang sa hơdoi tôm tong, tơgoăt tơgoăl gĭt kăl ƀar păh dêh char Kon Tum hăm dêh char Attapư. ‘Moi kiơ̆ hlôh vao dĭh băl, lui dĭh băl, đơ̆ng dôm tơdrong iŏk đei jơnei adoi nhen ƀô̆h hơdăh dôm tơdrong tơnap tap, tơdrong long, Dơnŏ anĭh vei lăng kon pơlei dêh char Kon Tum păng Khŭl kơdră dêh char Attapư, tĕh đak CHDCND Lào hlôi kĭ pơkăp Hla bơar ƀlŏk hơdơ̆r jang hơdoi jăl jang 2022- 2027 hăm dôm trong jang hơdăh lơ̆m rim tơdrong jang: Chĭnh trĭ, tơbôl, vei lăng sơđơ̆ng tĕh đak; Mŭk drăm; Pơtho pơhrăm păng atŏk tơ iung Khŭl bơ̆ jang.