Pơ gê ‘năr 3/11, tơ̆ pơlei tơm Kon Tum, Khŭl kang ƀô̆ chĕp kơ̆l dêh char Kon Tum păng dêh char Sê Kông, teh đak CHDCND Lào hlôi đei jơ bơ̆ jang hơ len lăng dơ̆ng pơ tôch jang hơ dai khei ‘năr âu ki păng kĭ pơ kăp Hla ar chih tơ ƀlŏk găh jang hơ dai jăl jang 2022-2027.  

Anih vei lăng kon pơ lei dêh char Kon Tum păng Khŭl kơ dră chĕp kơ̆l dêh char Sê Kông hlôi kĭ pơ kăp Hla ar chih tơ ƀlŏk đei 7 hơ păng găh jang hơ dai đơ̆ng 2 dêh char jăl jang 2022-2027.

Kiơ̆ kơ ‘noh, Kon Tum păng Sê Kông hơ nơ̆ng jang hơ dai kơ jăp găh vei sơ đơ̆ng, pơ jing tơ ring sơ lam rơ ngei, sơ đơ̆ng, jang hơ dai păng hơ tŏk tơ iung tôm tơdrong, pơm ‘lơ̆ng dôm tơdrong jang pơ trŭt tơ mơ̆t jên jang mơ dro sa, pơ trŭt bơngai tơ mơ̆t jên jang đơ̆ng dêh char tơ chă tơdrong hiôk tơ mơ̆t jên jang păng tơ lĕch jang tơdrong jang 2 dêh char, pơm tơdrong hiôk vă hŏk tro dêh char Sê Kông năm hŏk pơ hrăm tơ̆ dôm hơ nih pơ tho pơ hrăm tơ̆ Kon Tum kiơ̆ Tơ drong pơ tho pơ hrăm đăi hŏk jăl jang  2024-2029 păng ăn kang ƀô̆, hŏk tro dêh char Kon Tum năm hŏk tơ̆ dôm hơ nih pơ tho pơ hrăm tơ̆ Lào kiơ̆ Tơ drong pơ tho pơ hrăm kơ đeh năr; pơ trŭt pơ gơ̆r tơ klep tour, tơ mang lăng vă iŏk jang tơ mam ‘lơ̆ng tơ mang lăng tơ̆ trong gơ lang mŭk drăm Đông- Tây…