Pơma ăh Lêh kĭ pơkăp, ƀok Lê Ngọc Tuấn, Kơdră Anih vei lăng kon pơlei dêh char Kon Tum xơkơ̆t, mă dêh char Kon Tum păng dêh char Stung Treng, teh đak Campuchia ưh đei atŭm trong xơlam teh mă lei găh cham char plenh teh, mŭk drăm âu to đei lơ tơdrong nhen băl vă atŭm băl jang hadoi hơtŏk tơ-iung lơ̆m dôm tơdrong jang mă rim păh tơrĕk truh, kiơ̆ pơkăp hlôh vao, lui ngeh dih băl, Khul Kơpal kơ dêh char Kon Tum păng Stung Treng, teh đak Campuchia hlôi hơlen hơdăh tơdrong đei jơnei đơ̆ng jang hadoi lơ̆m khei năr âu ki, tơƀôh dôm tơdrong tơnap tap, tơhlăk tơhlĭn păng drơ̆ng nơ̆r kĭ pơkăp Hla bar tơbăt tơdrong jang hadoi.

Lơ̆m noh đei tơdrong jang Mŭk drăm, Tĕch pơdro gô akŏm jang hadoi hơtŏk tơmang pơhiơ̆, choh jang xa, tĕch pơdro păng kŏng thương. Găh tơdrong jang Joh ayŏ - Tơpôl akŏm jang hadoi hơtŏk găh pơtho pơhrăm, joh ayŏ, tơgŭm bơngai Việt tơ̆ dêh char Stung Treng. Găh tơdrong jang Y tê̆ tơroi dih băl tơdrong hlôh vao lơ̆m tang găn păng tơjră pơrang jĭ, pơtho bơngai jang găh pơgang hơmet jĭ jăn păng pơm tơdrong axong Khul jang. Ƀar păh drơ̆n gnơ̆r 2 xơnăm minh 'măng gô pơlơh băl pơgơ̆r Hop akŏm xơkơ̆t tơdrong jang đei jơnei dôm tơdrong hlôi đei kĭ pơkăp.