VOV4.Bahnar - Kơ dră vei lăng kon pơ lei dêh char Kon Tum ‘nao đei hla ar chih kơ sô̆ 02 pơ tho ăn dôm anih jang kơ pal kơ dêh char hơ tŏk tơ drong vei lăng bri tơ̆ apŭng Kon Plông. Dơ nŏ anih vei lăng kon pơ lei dêh char Kon Tum akhan, tơ drong kŏh phă bri, tơ gar iŏk tĕh bri, kŏh iŏk ‘long glăi luơ̆t tơ̆ apŭng Kon Plông oei đei tôch dêh. Tơ̆ apŭng hơ nơ̆ng đei tơ drong kŏh phă bri, tơ gar iŏk tĕh bri, chơ chuĕn ‘long glăi luơ̆t… mă ‘nao hlŏh jĭ tơ drong kŏh ot 26 tơm ‘long tơ̆ anih 11, tơ ƀôh 486 yoa Dơ nŏ anih vei lăng kon pơ lei thĭ trơ̆n Măng Đen vei lăng. 

Anih đe kŏh phă bri ‘long tơ̆ apŭng Kon Plông

Kơ dră vei lăng kon pơ lei dêh char Kon Tum athei dôm anih jang kơ pal jăh jang hơ doi hăm dôm anih đei ƀơm truh, dăr hơ len, pơm hơ dăh bơ ngai kŏh iŏk ‘long glăi luơ̆t, kơ sô̆ ‘long đei kŏh iŏk đơ̆ng anih 11, tơ ƀôt bri 486, thĭ trơ̆n Măng Đen, apŭng Kon Plông đei chơ năm tơ̆ yơ. Dăr hơ len đang athei roi tơ băt ăn Dơ nŏ anih vei lăng kon pơ lei dêh char păng dôm anih jang kơ pal kiơ̆ tơ drong hơ găt.

Dơ̆ng: Tơ blơ̆