VOV4.Bahnar - Dêh char Kon Tum iung jang kơtang lăp đơ̆ng rŏng VOV chĭh tơbăt tơdrong pơm glăi lơ̆m kôch iŏk chuơ̆h tơ̆ đak kroong Pô Kô, găh pơlei Kà Nhảy, tơring Đak Nông apŭng Ngọc Hồi păng tơ̆ đak kroong Đak Pxi, găh thôn 7, tơring Đak Pxi, apŭng Đak Ha.

Hơnĭh mơdro sa pơm trong tŏk bŏk đak kroong Đak Pxi vă kôch iŏk chuơ̆h mă lei Dơnŏ anĭh vei lăng kon pơlei tơring Đak Pxi ư̆h kơbăt păng Dơnŏ anĭh vei lăng Mŭk drăm bri brăh păng cham char apŭng Đak Ha lăp tang găn hăm ƀơ̆r

Mă kăl, Dơnŏ anĭh vei lăng Mŭk drăm bri brăh păng Cham char dêh char Kon Tum hlôi pơdrĕo hla bơar athei kĭ tĕch hơnĭh sir kôch iŏk chuơ̆h tơmo huêr, tơmo vă pơm tơmam drăm ming man tơ̆ hơnih kôch iŏk chuơ̆h đak kroong Đak Pxi, găh thôn 7, tơring Đak Pxi, apŭng Đak Hà. Mă hơdăh lơ̆m hla bơar pơtrŭh ăn Khŭl bơ̆ jang lơ hơnĭh jang năm dăr lăng, lăng hơlen tơdrong jang kôch iŏk chuơ̆h tơmo lơ̆m dêh char Kon Tum, Dơnŏ anĭh vei lăng Mŭk drăm Bri brăh păng Cham char, Hơnĭh bơ̆ jang ăn Dơnŏ anih vei lăng kon pơlei dêh char Kon Tum pơjao ăn Khŭl bơ̆ jang pơm tơm, iung jang hơdoi hăm Dơnŏ anĭh vei lăng Trong nơnăm dăr lăng, pơm hơdăh dôm tơdrong mă hơnĭh chĭh kơtơ̆ng ang chĭh tơbăt, xek tơlang rim tơdrong pơm glăi (tơdăh đei) kiơ̆ gơ̆h jang păng tơdrong tơchơ̆t đơ̆ng Khôi luơ̆t.

Tơblơ̆ nơ̆r: Amazưt