Dêh char Lâm Đồng jĭ 1 tơring đei lơ tơdrong pran găh tơmang lăng, choh jang sa kơ Việt Nam. Tơdrong pơ ‘nhŏ đơ̆ng cham char bri ‘brăh, đơ̆ng tŏ ‘mi kial hlôi pơm đei cham char hiôk păng hui kơ đei tơ̆ Việt Nam vă dêh char Lâm Đồng gơh pơm tơlĕch lơ tơmam đơ̆ng choh jang sa ‘lơ̆ng. Lơ̆m kơplăh ‘noh Australia tŏk bŏk đei ‘meh vă lơ găh cheh phe ƀơ̆t mă jô̆ păh lăp rim ‘nu kon pơlei teh đak ‘nâu răt yua 2 kĭ cheh phe 1 sơnăm. Australia kŭm đei lăng ‘noh jĭ anih tĕch mơdro đei lơ tơmam ‘lơ̆ng hăm găr điêu păng pơkao dôm kơ loăi đơ̆ng Lâm Đồng.

Yua thoi noh, Anih vei lăng kon pơlei dêh char Lâm Đồng hlôi ăn khŭl bơ̆ jang năm tơ̆ Australia bơ̆ jang păng pơgơ̆r dôm tơdrong jang pơtrŭt mơdro sa. ‘Ngoăih kơ tơdrong pơtrŭt mơdro sa, dêh char Lâm Đồng kŭm ‘meh đei Australia pơjao kơmăy kơmŏk pơm tơlĕch hơdrĕch, kơmăy kơmŏk sơ̆k hơdrĕng tơmam đơ̆ng choh jang sa hăm ŭnh hơyuh măt ‘năr, choh pơtăm kơdih, kơmăy hơmet ‘lơ̆ng râm rĕk mă loi ‘noh jĭ tơmam đơ̆ng choh jang sa đĭ hŭt bơih, trong jang choh jang sa hơgei...