VOV4.Bahnar -Lơ̆m 2 năr ‘năr 21 păng 22/9, Đoan hơ druh tơ dăm Cộng sản Hồ Chí Minh dêh char Dak Nông hlôi pơ gơ̆r Hop akŏm bơ ngai tang măt ‘măng mă IV, jăl jang 2022-2027, hăm tơ drong vang akŏm đơ̆ng 200 ‘nu tang măt ăn hloh 157.000 đoàn viên hơ druh tơ dăm lơ̆m dêh char. ‘Nâu jĭ dêh char mă blŭng tơ̆ tơ ring Tây Nguyên pơ gơ̆r hop akŏm đoan hơ druh tơ dăm. Kiơ̆ tơ roi tơ băt tơ̆ Hop akŏm, jăl jang âu ki, đoan hơ druh tơ dăm Dak Nông hlôi jang kiơ̆ đei păng yak hloh 11/12 tơ drong hơ găt. Ƀôh hơ dăh ‘noh jĭ tơ drong jang pơ jing tơ ring tơ rang ‘nao, rim khŭl jang Đoan hlôi jang kiơ̆ vă jê̆ 7.000 tơ drong jang hơ druh tơ dăm hăm akŏm kơ jă hloh 38,43 ti hlak jên. Hơ druh tơ dăm lơ̆m dêh char hlôi pơ gơ̆r rơ bâu tơ drong jang tơ roi tơ băt păng tơ lĕch jang vei lăng cham char, hơ met rơ goh râm rĕk, pơ tăm ‘nao hloh 700.000 tơ nơm ‘long rim kơ loăi; ming man, pơm hơ met ming 127 hơ nih ngôi pơ chơt ăn hơ druh tơ dăm, hơ ioh, jang kiơ̆ lơ tơ drong jang tơ gŭm hơ ioh mơ mat tat hăm akŏp kơ sô̆ jên hloh 15 ti hlak jên.

Hơ druh tơ dăm dêh char Dak Nông hlôi tơ lĕch 12 grŭp tơ drong hơ găt, 8 tơ drong jang tơm jăl jang 2022- 2027

Hăm nơ̆r pơ ma bơ̆ jang: “Sơ năm mơ lôh Dak Nông iung jang, hơ pơi ‘meh, hơ gei, hơ tŏk tơ iung”, Hop akŏm đoan hơ druh tơ dăm Cộng sản Hồ Chí Minh dêh char Dak Nông ‘măng mă IV, jăl jang 2022- 2027 hlôi tơ lĕch ăn 12 grŭp tơ drong hơ găt, 8 tơ drong jang tơm hăm hơ drin tơ plih hơ pơi ‘meh jing dôm tơ drong jang hơ nhăk ăn iŏk yua hơ dăh ‘lơ̆ng. Kăl kơ lăng truh ‘noh jĭ dôm tơ drong hơ găt nhen: rim sơ năm pơ tăm ‘nao 250.000 tơ nơm ‘long; tơ gŭm 10 pơ lei mơ mat tat jang đang tơ drong hơ găt tơ ring tơ rang ‘nao; tơ gŭm 200 ti hlak jên ăn hơ druh tơ dăm tŏk iŏk jên tơ iung jang sa; jô̆ păh lăp rim sơ năm tơ jur hloh 6% ŭnh hnam dơ nuh hin hơ druh tơ dăm kon kông...

Thuem: Tơ blơ̆