VOV4.Bahnar - ‘Năr 13/3, dôm Anih tơm, anih jang kơ pal, anih tang măt ăn Việt Nam đei ƀơm truh pơ gơ̆r 2 ‘măng păr chơ vă jê̆ 600 ‘nu kon pơ lei Việt Nam păng unh hnam kơ dâu jăk đơ̆ng Ukraine năm tơ̆ Ba Lan păng Rumania vih dơ̆ng tơ̆ tĕh đak sơ đơ̆ng ‘lơ̆ng.

Lơ̆m nŏh đei 138 ‘nu hơ iŏh đơ̆ng 3 khei truh 18 sơ năm, 70 ‘nu bơ ngai kră kŭm hăm lơ drŏ kăn oei hơ năp păng bơ ngai jĭ jăn. Lơ bơ ngai đei hlŏh 30 sơ năm arih xa, bơ̆ jang tơ̆ Ucraina. Vih dơ̆ng tơ̆ tĕh đak yoa đei tơ drong tơ blăh, lơ bơ ngai ưh đei hla ar chih tơ băt kơ dih kâu, ưh đei visa, ưh đei hla ar hô̆ chiê̆u. Mă lei dôm anih tơm pơ tho ăn dôm khul jang kơ pal tơ̆ cham gre păr tơ gŭm sek tơ lang mă tơ tom tơ drong chih tơ roi, pơm hla ar vă gơ̆h ƀơk dơ̆ng hla ar kăl.

Dơ̆ng: Tơ blơ̆