VOV4.Bahnar - Ƀơm truh tơ drong jang man dơ nâu đak Krông Pách thượng 4.400 ti man hiơ̆ hyĭn, ‘năr 21/3, khul jang đơ̆ng Anih tơm vei lăng choh jang xa păng atŏk tơ iung tơ ring tơ rang năm dăr lăng păng athei jăh jang kĕh tơ drong pơ jing pơ lei oei xa ‘nao yoa hơ mơt đei đak lơ̆p nhen dôm sơ năm adrol ki dơ̆ng. Khul jang truh dăr lăng tơ̆ anih pơ gơ̆r ming man dơ nâu Krông Pách thượng, dôm hơ bong pơ ro đak tơm, hơ bong iĕ păng 2 pơ lei oei xa kơ sô̆ 1 păng kơ sô̆ 2 đơ̆ng tơ drong jang ‘nâu. 

Khul jang yoa Phŏ Kơ dră tơm vei lăng choh jang xa păng atŏk tơ iung tơ ring tơ rang Nguyễn Hoàng Hiệp chĕp kơ̆l dăr lăng tơ drong jang man dơ nâu đak Krông pách thượng

Kiơ̆ nơ̆r tơ roi đơ̆ng Anih vei lăng tơ drong jang man dơ nâu đak 8, truh dang ei, dơ nâu đak hlôi man đei 80% bơih, dơ nâu đak tơm man vă đang bơih păng hlôi man đang hlŏh 40km lơ̆m kơ sô̆ 60km hơ bong pơ rong đak. Hăm pơ lei oei xa ‘nao, Anih tơm vei lăng choh jang xa păng atŏk tơ iung tơ ring tơ rang athei lơ̆m khei 6 truh, Dak Lak athei pôk rĭ đĭ đăng hnam kon pơ lei lĕch đơ̆ng tơ ring đak lơ̆p lơ̆m hơ lŏng dơ nâu Krông Pách thượng.

Dơ̆ng: Tơ blơ̆