VOV4.Bahnar - Anih tơm vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng jang hơ doi hăm dôm Anih tơm đei ƀơm truh vă đei nơ̆r pơ tho hơ dăh găh rim tơ drong mưh pơih ‘măng chă tơ mang lăng vă tơ lĕch lơ̆m giĕng truh.

‘Nâu jĭ nơ̆r pơ ma đơ̆ng Phó Thủ tướng Vũ Đức Đam tơ̆ hop akŏm găh trong pơih ‘măng ăn tơ drong chă tơ mang lăng ƀât mă oei krê jĭ hơ buh, vă gơ̆h jang xa sơ đơ̆ng ‘lơ̆ng, tang găn ‘lơ̆ng tơ drong jĭ Covid-19, tơ klep hăm dar dĕh tơ iung ming dơ̆ng mŭk drăm tơ pôl. Tơ̆ hop akŏm, bơ ngai tang măt ăn dôm anih tơm pơ ma nuh tôch hơ len găh rim tơ drong păng drơ̆ng nơ̆r ăn trong pơih ‘măng ăn tơ drong chă tơ mang lăng hăm apŭng plenh tĕh đơ̆ng ‘năr 15/3/2022.

Pơ ma pơ tôch hop akŏm, Phó Thủ tướng Vũ Đức Đam akhan: Dang ei kiơ̆ jơ hngâm đon kơ chăng lơ̆m khei ‘năr oei krê jĭ, bơ̆ jang sơ đơ̆ng ‘lơ̆ng, tang găn tơ tom bơ̆n athei rim anih jang kơ pal vang bơ̆ jang hơ doi, pơ jao ăn Anih tơm vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng pơ gơ̆r jang hơ doi hăm Anih tơm vei lăng jang pơ gang păng dôm anih tơm kăl đei nơ̆r pơ tho mă rơ đăh vă tơ roi ăn Khul kơ dră tĕh đak kĭ tơ băt găh tơ drong pơm hla ar Visa.

Dơ̆ng: Tơ blơ̆