VOV4.Bahnar - Kŭm hăm hŏk tro lơ̆m teh đak, tơ̆ Tây Nguyên rim hŏk tro vang akŏm ‘măng pơ long tốt nghiệp THPT sơ năm 2022 hlôi truh tơ̆ hơ nih pơ long pơm hla ar chih măt vang pơ long kơ sơ̆ brei ‘năr 6/7 păng pơ gê hei yak mơ̆t lơ̆m môn pơ long mă blŭng, môn văn. Tơ̆ Dak Lak, đei lơ oh ƀơ̆t đei apĭnh tơ băt ƀôh lui ngeh yak mơ̆t lơ̆m ‘măng pơ long. Mă đơ̆ng lơ ‘măng athei tơ plih trong hŏk pơ hrăm đơ̆ng kơ tă jing trực tuyến đang kơ ‘noh đơ̆ng trực tuyến vih kơ tă yua đơ̆ng ƀơm ưh kơ ‘lơ̆ng đơ̆ng jĭ Covid 19, ƀơm ưh kơ ‘lơ̆ng truh tơ drong hŏk ƀai hăm hŏk tro lăm 12, mă lei hăm tơ drong hơ drin đơ̆ng kơ dih kâu păng tơ drong tơ năp đơ̆ng đe thây kô pơ tho lơ̆m khei ‘năr âu ki, lơ oh hŏk tro tơ băt kơ dih hlôi hơ met ăn ƀai hŏk, jơ hngơ̆m đon ‘lơ̆ng vă vang pơ long ‘măng pơ long âu. ‘Măng pơ long THPT sơ năm ‘nâu, dêh char Dak Lak đei hloh 20.400 ‘nu hŏk tro chih măt vang pơ long tơ̆ 32 hơ nih pơ long.

‘Măng thi tốt nghiệp THPT sơ năm ‘nâu, dêh char Lâm Đồng đei hlŏh 14.000 ‘nu hŏk tro vang thi. Vă pơm ăn ‘măng thi gơ̆h pơ gơ̆r sơ đơ̆ng ‘lơ̆ng, trŏ tơ drong hơ găt, dêh char hơ met 38 anih thi hăm 629 lăm thi, lơ̆m nŏh đei 6 lăm thi tơ gep tơ̆ dôm apŭng, plt lơ̆m dêh char. ‘Ngoăih kơ hơ tŏk dôm trong jang tang găn jĭ, vei sơ đơ̆ng tơ mam xa, tơ drong yak vih vât, vei sơ đơ̆ng lơ̆m tơ pôl ăn đe hŏk tro năm thi, dêh char Lâm Đồng oei pơ tho ăn khul kơ dră dôm tơ ring lơ̆m dêh char tơ gŭm mă tơ tom ăn hŏk tro mơ mat tat găh jên sŏng xa, tep pơ dơ̆h păng yak vih vât. Kiơ̆ yă Trần Thị Vũ Loan, Phŏ Kơ dră vei lăng kon pơ lei plt Đà Lạt, ‘ngoăih kơ pơ jing tơ drong ‘lơ̆ng hlŏh ăn hŏk tro, yoa ‘măng thi pơ gơ̆r lơ̆m khei ‘năr Đà Lạt đei lơ bơ ngai truh tơ mang lăng, pơ dơ̆h ngôi kơ na tơ drong vei sơ đơ̆ng tơ̆ trong nơ năm ăn hŏk tro kŭm đei năng kăl.

Kơ dră chĕp kơ̆l Lâm Đồng hơ len năng tơ drong hơ met thi tốt nghiệp THPT sơ năm 2022 tơ̆ dêh char

Đơ̆ng pơ gê ‘năr 6/7, Anih jang Đoan dêh char Gia Lai pơ gơ̆r lêh tơ lĕch jang tơ drong jang “ Roi tơ ƀôh - tơ gŭm pơ yan pơ long” sơ năm 2022. Vă tơ gŭm hŏk tro păng bơ ngai ŭnh hnam hŏk tro lơ̆m ‘măng pơ long tốt nghiệp THPT sơ năm 2022, Khŭl pơ gơ̆r tơ drong jang “ Roi tơ ƀôh - tơ gŭm pơ yan pơ long” dêh char Gia Lai hlôi pơ jing 39 khŭl hơ druh tơ dăm năm tơ gŭm hăm 292 ‘nu.

Dôm đoan viên hơ druh tơ dăm kơ dêh char Gia Lai hlôi đei măt tơ̆ dôm hơ nih pơ long vă roi tơ ƀôh, tơ gŭm ăn ‘măng thi THPT teh đak

Dôm bơ ngai jang tơ gŭm hăm hơ năp jang ‘noh: roi tơ ƀôh hnam ƀĭch đĕch, hnam ƀĭch kơ jă reh, hơ nih sŏng sa reh, vei sơ đơ̆ng rơ goh tơ mam sa ăn hŏk tro păng bơ ngai ŭnh hnam hŏk tro; tơ gŭm chơ ba iŏk hŏk tro tơ̆ dôm hơ nih pơ long; tơ gŭm hŏk tro đei tơ drong arih sa mơ mat tat; asong che gom, đak nhă đĕch ăn hŏk tro. Lăp đơ̆ng rŏng lêh tơ lĕch jang, dôm bơ ngai jang tơ gŭm hlôi tơ tĕnh đei măt tơ̆ dôm hơ nih pơ long vă vang jang “ Roi tơ ƀôh - tơ gŭm” ăn hŏk tro pơ long.

Thuem hăm Dơ̆ng: Tơ blơ̆