VOV4.Bahnar - Năr ‘nâu (16/2), 2.656 hơ druh tơ dăm kơ dêh char Gia Lai gô năm pơm ƀô̆ đô̆i - Kŏng an kon pơ lei. Truh khei ‘năr âu, dôm kon pơ lei hlôi đei măt tơ̆ hơ nih hơ găt vă pơ gơ̆r test hrĕnh Covid-19 păng iŏk đak muh đak hai hơ len lăng hăm trong RT-PCR. Kơ sô̆ kon pơ lei âu gô đei pơ jao ăn rim anih jang: Quân đoàn 3, Quân khu 5, Kŏng an dêh char, Anih tơm pơ gơ̆r Bô̆ đô̆i vei lăng tơ ring sơ lam dêh char păng Anih tơm pơ gơ̆r Khŭl linh dêh char. Kiơ̆ kơ chih jô̆, kơ sô̆ kon pơ lei mơ̆t pơm lĭnh sơ năm ‘nâu đei hŏk jăl 2, jăl 3 đei vă jê̆ 80%; hŏk trung cấp, cao đẳng, đại học đei hloh 1,4%; đoàn viên đei hloh 76%; đei 22 ‘nu ‘noh đảng viên. Sơ năm ‘nâu, lơ̆m kơ sô̆ 2.250 hơ druh tơ dăm năm pơm lĭnh đei truh 61% ‘noh bơ ngai kon kông. Vă dôm hơ druh tơ dăm sơ đơ̆ng năm pơm lĭnh, rim tơ ring hlôi pơ gơ̆r năm ngôi, pơ lung, akŏm jang kiơ̆ ‘lơ̆ng trong jang tơ gŭm - khŭl linh.

Kiơ̆ trong tơ lĕch jang, 170 ‘nu kon pơ lei rơ̆ih năm pơm lĭnh kơ pơ lei tơm Kon Tum, dêh char Kon Tum đei hơ met ăn oei sa akŏm tơ̆ Hơ nih Pơ hrăm khŭl linh, đơ̆ng ‘năr 11/2 truh năr pơ jao iŏk lĭnh sơ năm 2022. Lơ̆m jơ năr âu, dôm kon pơ lei đei rơ̆ih năm pơm lĭnh vang pơ tâp pơ hrăm hơ kâu jăn tơ̆ pơ gê, 16 tơ drong pơ tâp byoh pơ gê, nơ̆r hơ găt khŭl linh ti hoh; pơ tho chơ̆p hơ met bơ̆n khăn, hơ băn ao, pơ tâp hơ ri dôm ƀai hơ ri păng yuă sŏk kiơ̆ hơ găt lơ̆m khŭl linh; hơ dai hăm ‘noh pơ gơ̆r dôm tơ drong ngôi pơ chơt pơm tơ drong chhôk hơ iă ăn hơ druh tơ dăm hơ drol kơ năm pơm lĭnh. Hăm tơ drong hơ drin đơ̆ng kơ dră đảng, khŭl kơ dră tơ ring păng Jơ nŭm vei lăng tơ drong jang khŭl linh pơ lei tơm Kon Tum lơ̆m tơ drong jang vei lăng, ăn oei hơ drô̆ akŏm kon pơ lei hơ drol kơ năm pơm lĭnh, gô tơ gop vă dêh char Kon Tum jang đang ‘lơ̆ng tơ drong jang rơ̆ih iŏk lĭnh sơ năm 2022.

Thuem hăm Dơ̆ng: Tơ blơ̆