VOV4.Bahnar - Kơ sơ̆ 13/10, Khul bơ ngai tĕch mơ dro dêh char Dak Lak jang hơ doi hăm Khul bơ ngai tĕch mơ dro oei mơ lôh kơ dêh char pơ gơ̆r tơ ƀâp hơ iă kơ Năr Bơ ngai tĕch mơ dro Việt Nam 13/10. Tơ̆ jơ tơ ƀâp, Kơ dră chĕp kơ̆l Khul bơ ngai tĕch mơ dro dêh char roi tơ băt găh tơ drong jang xa lơ̆m 9 khei sơ năm 2022. Dơ̆ng lăng lêh kĭ pơ kăp jang hơ doi tôm tơ drong đơ̆ng Khul tĕch mơ dro dêh char Dak Lak hăm Khul bơ ngai tĕch mơ dro oei mơ lôh kơ dêh char Dak Lak.

Kơ dră chĕp kơ̆l dêh char Dak Lak hơ păh pơ kao hơ iă hăm Bơ ngai tĕch mơ dro

Dak Lak hrei ‘nâu đei vă jê̆ 11.800 anih tĕch mơ dro oei jang xa, dơ̆ng mă 22 lơ̆m tĕh đak păng dơ̆ng mă 2 tơ̆ tơ ring Tây Nguyên. Hăm tơ drong jang tŏk hrenh găh kơ sô̆, khul bơ ngai tĕch mơ dro, anih tĕch mơ dro đei lơ tơ drong tơ gop ăn tơ drong jang tŏk mŭk drăm tơ pôl tơ̆ tơ ring. Kiơ̆ ƀok Huỳnh Văn Dũng, Kơ dră Khul bơ ngai tĕch mơ dro dêh char Dak Lak, đơ̆ng blŭng sơ năm truh dang ei, Dak Lak pơ jing ‘nao hlŏh 1.000 anih tĕch mơ dro, tŏk vă jê̆ 26% pơ têng hăm khei âu sơnăm sơ̆. Tơ drong tŏk ‘nâu pơ jing dơ̆ng jơ hngâm pran ăn khul bơ ngai tĕch mơ dro Dak Lak tơ gop ăn tơ drong vei sơ đơ̆ng păng jang tŏk mŭk drăm kơ dêh char.

Ƀlep ƀơ̆t năr Bơ ngai mơ dro sa Việt Nam, kơ sơ̆ brei (13/10), tơ̆ pơ lei tơm Kon Tum, Anih vei lăng kon pơ lei dêh char Kon Tum pơ gơ̆r Hop akŏm pơ ma dơ nuh anih jang mơ dro sa ‘măng mă 2. ‘Nâu jĭ trong jang đei yua vă dêh char Kon Tum hơ met pơ ‘lơ̆ng tơ tom dôm tơ drong mơ mat tat, tơ hlăk tơ hlĭn đơ̆ng anih jang mơ dro sa mưh năm chă hơ len lăng, tơ mơ̆t jên jang păng tơ gop tơ plih ‘lơ̆ng hơ nih tơ mơ̆t jên jang tĕch mơ dro tơ̆ dêh char.

Jơ hop akŏm

Pơ ma tơ̆ hop akŏm pơ ma dơ nuh hăm hăm anih jang mơ dro sa ‘măng mă 2, ƀok Nguyễn Hữu Tháp, Phŏ Kơ dră Anih vei lăng kon pơ lei dêh char Kon Tum pơ ma hơ dăh, pôk pơ ư dôm bơ ngai mơ dro sa, anih jang mơ dro sa hlôi hơ drin yak hloh mơ mat tat, đei tơ gop gĭt kăl lơ̆m tơ iung ming, hơ tŏk tơ iung mŭk drăm - tơ pôl kơ dêh char đơ̆ng rŏng jĭ COVID-19.Hăm jơ hngơ̆m đon rơ hâu, tơ păt, tơ̆ hop akŏm pơ ma dơ nuh anih jang mơ dro sa ‘măng mă 2, tang măt 1,2 anih jang mơ dro sa hlôi apĭnh hăm kơ dră chĕp kơ̆l dêh char Kon Tum lơ tơ drong tŏk bŏk tơ ƀơ̆p ƀơm lơ̆m kơ plăh chă hơ len lăng, tơ mơ̆t jên jang păng bơ̆ jang pơm tơ lĕch, tĕch mơ dro.

VOV Tây Nguyên/ Dơ̆ng -Thuem tơ blơ̆