VOV4.Bahnar - Sơng hơ iŏh năm hŏk dơ̆ng tơ̆ hnam hŏk đơ̆ng tŏk bŏk khei 2/2022, dôm anih pơ tho hŏk mâm non tơ̆ plt Pleiku, dêh char Gia Lai oei hơ nơ̆ng tơ lĕch lơ trong jang vă vei sơ đơ̆ng, tang găn ‘lơ̆ng tơ drong jĭ COVID-19. Kŭm hăm ‘nŏh, dôm anih jang tơ roi tơ băt, krao hơ vơn mĕ ƀă ba kon năm hŏk, pơ jing tơ drong arih xa thoi hmă dơ̆ng.

Hơ iŏh mâm non gom muh măt lơ̆m jơ hŏk pơ hrăm păng ngôi pơ chơt

Anih vei lăng pơ tho pơ hrăm Gia Lai ăn tơ băt, dang ei lơ̆m dêh char đei 253/257 anih pơ tho ăn hơ iŏh mâm non năm hŏk hơ dai. Vă jê̆ 1 giĕng ki, đei 87% hơ iŏh năm hŏk dơ̆ng. Năng atŭm, tơ̆ dôm apŭng, thĭ xăh, kơ sô̆ hơ iŏh năm hŏk dơ̆ng tôch lơ. Hăm tơ drong pơ tho hŏk sơ đơ̆ng ‘lơ̆ng, kơ sô̆ hơ iŏh năm hŏk dơ̆ng oei tŏk kiơ̆ năr. Kiơ̆ Anih vei lăng, jăl hŏk mâm non jĭ jăl hŏk tôch gĭt kăl, tơ gŭm ăn hơ iŏh tih vơ̆ djơ̆ ‘lơ̆ng, hlôh vao păng đei jơ hngâm đon sơ đơ̆ng adrol kơ mât hŏk lăm 1. Yoa thoi nŏh, tơ drong ăn hơ iŏh năm hŏk dơ̆ng tơ̆ hnam trưng hrôih ƀiơ̆ ‘nŏh jĭ tơ drong tôch gĭt kăl.

Dơ̆ng: Tơ blơ̆