Mŏ Cil Sa La Môn (bơngai K’Ho) oei tơ̆ xăh Đam Rông 4, dêh char Lâm Đồng chơt hơiă đei dơ̆ng lơ̆m khŭl Đảng ƀơ̆t oei sinh viên sơnăm hơtuch kơ Hnam trưng Đại học Đà Lạt. Sơnăm 2015, đơ̆ng rŏng kơ hŏk đang mŏ vih bơ̆jang tơ̆ xăh Đạ Long so, dang ei găh xăh Đam Rông 4. Lơ̆m 10 sơnăm vang jang tơdrong jang đoan păng Khŭl vei lăng drŏ kăn xăh, mŏ  Cil Sa La Môn hlôi đei lơ pơcheh, tơgop ăn tơdrong hơtŏk tơiung mŭk drăm - tơpôl pơma atŭm, tơdrong hơgei đơ̆ng mŏ oh drŏ kăn pơma hơdrô̆. Khŭl vei lăng drŏ kăn xăh hlôi pơjing lơ tơdrong jang “Grŭp jang hơdai drŏ kăn pơtăm ‘long mơ mur rong hơdrông pơm brai”, sơng đei hloh 25 ‘nu bơngai drŏ kăn vang jang. Jô̆ păh lăp 1 ‘măng rong iŏk đei đơ̆ng 6 truh 8 triệu hlak jên. Grŭp hlôi tơgŭm 7 ‘nu bơngai jang lơ̆m khŭl klăih đơ̆ng dơnuh hin gơnang đơ̆ng pơtăm ‘long mơmur rong hơdrông pơm brai. Mŏ Cil Sa La Môn tơroi:

“Kơdih kâu ĭnh ‘meh păr ang tơdrong hlôh băt đơ̆ng kơdih truh bôl buăl, kon pơlei kon kông bơ̆n. ‘Moi kiơ̆ tơdrong jang đơ̆ng kơdih vă kon pơlei mă loi ‘noh bơngai kon kông hlôh rơđăh trong jang tơgŭm ‘lơ̆ng hơiă đơ̆ng Đảng păng teh đak ‘noh jĭ ‘meh vă hơtŏk ‘lơ̆ng tơdrong hơrih sa tơpôl ăn tơring kon pơlei kon kông”.

Oei hăm mŏ Cil Pam K’Quyên (bơngai K’Ho), rơneh sơnăm 1989, oei tơ̆ xăh Lạc Dương, dêh char Lâm Đồng, đơ̆ng rŏng kơ hŏk đang Đại học Yersin Đà Lạt, sơnăm 2013, mŏ vih tơ̆ pơlei păng vang jang tơdrong jang tơ̆ tơring. Đơ̆ng noh truh dang ei, mŏ hlôi yak hloh lơ kơchư̆k jang nhen pơm Bơngai pơgơ̆r pơlei plei Dà Blah, xăh Dà Nhim (so), đang kơ ‘noh Bí thư Đoàn xăh, Kơdră Khŭl vei lăng kon pơlei jang chŭn mir xăh, Kơdră Anih jang Mặt trận Tổ quốc Việt Nam xăh Đà Nhim pơm hloi Bí thư Chi bộ plei Dà Blah.

Lơ̆m kơplăh bơ̆jang, mŏ Cil Pam K’Quyên hlôi hơdrin roi tơbăt dôm trong jang đơ̆ng Đảng, tơdrong jang tơgŭm, khôi luơ̆t đơ̆ng Teh đak truh rim răih kon pơlei. Mŏ kơchăng jang hơdai hăm kră pơlei, bơngai đei đe lui yom, bơngai pơtho lui krao hơvơn kon pơlei vang tơgop hloh 3.370 năr jang, plang song vă jê̆ 5.000 m² teh vă pơm trong lơ̆m pơlei. Mặt trận Tổ quốc Việt Nam xăh kŭm hlôi krao hơvơn man đei 10 tŏ hnam Tơgoăt tơgoăl tơgŭm dôm ŭnh hnam pơmat tat. Đơ̆ng iŏk yua lơ̆m tơdrong jang krao hơvơn kon pơlei, tơƀôh hơnăp jang đơ̆ng bơngai drŏ kăn lơ̆m ŭnh hnam păng tơpôl, mŏ Cil Pam K’Quyên roi tơbăt:

“Hăm bơngai kon kông kiơ̆ drŏ kăn vei lăng lơ̆m hnam nhen nhôn, ‘noh kơdih kâu ĭnh kŭm nhen đe mŏ oh drŏ kăn tơ̆ pơlei, tơ̆ xăh ‘meh vă tơgop tŏ sĕt jơhngơ̆m iĕ ioch đơ̆ng kơdih ăn tơpôl. Mă hơdăh hloh ‘noh jĭ jang ‘lơ̆ng hơnăp jang bơngai drŏ kăn lơ̆m ŭnh hnam, đơ̆ng rŏng ‘noh jang ‘lơ̆ng tơdrong jang tơpôl... Yua kơ lăp đei thoi noh ‘noh bơ̆n mă păr ang đei nơ̆r pơma yak tŏk pơmat pơm pơdrŏng ăn kon pơlei lơ̆m pơlei pơla, mă loi ‘noh drŏ kăn vang jang hơtŏk tơiung mŭk drăm ŭnh hnam, đơ̆ng noh tơgop lơ̆m tơdrong hơtŏk tơiung mŭk drăm atŭm kơ tơring”.

Dêh char Lâm Đồng, dang ei hloh 500.000 drŏ kăn vang jang lơ̆m khŭl. 5 sơnăm âu ki, rim kơdră khŭl hlôi tơgŭm 5.000 ŭnh hnam drŏ kăn klăih đơ̆ng dơnuh hin, tơgŭm pơjing ‘nao 17 hơp tak xăh yua đơ̆ng drŏ kăn vei lăng. Hloh 1.200 tơdrong jang đơ̆ng drŏ kăn hlôi bơ̆jang; tơlĕch jang đei yua Tơdrong jang 8 hăm kơhrĕng tơdrong jang pơtrŭt hơtŏ băl đơ̆ng drŏ nglo hăm drŏ kăn păng hơtŏk ‘lơ̆ng anih dơ̆ng drŏ kăn tơring kon pơlei kon kông. Yă Cil Bri, Phŏ Kơdră Anih vei lăng Hơdrĕch kon kông păng Lui khop dêh char Lâm Đồng roi tơbăt, kơsô̆ drŏ kăn vang jang kơdră đảng jăl jang âu ki đei 13,5%; drŏ kăn tang măt Jơnŭm pơgơ̆r kon pơlei dêh char đei vă jê̆ 28%; lơ mŏ oh drŏ kăn pơm kơdră chĕp kơ̆l anih jang. Tơdrong ‘noh tơƀôh tơdrong gơh jang, nuih păng anih dơ̆ng roi ‘năr toi đei tơƀôh hơdăh đơ̆ng drŏ kăn Lâm Đồng.

"Khei ‘năr âu ki, tơ̆ tơring kon pơlei kon kông kơ dêh char Lâm Đồng đei tơdrong tơplih rơđăh rơđong lơ̆m tơdrong hơrih sa, tơgop hơtŏk tơiung mŭk drăm - tơpôl, vei lăng tơdrong sơđơ̆ng lơ̆m ŭnh hnam păng vei sơđơ̆ng tơring ‘noh jĭ 1 păh tơgop tôch kơ tih đơ̆ng đe mŏ oh drŏ kăn, lơ̆m noh đei tơdrong vang tơgop ‘lơ̆ng đơ̆ng đe drŏ kăn đảng viên bơngai kon kông tơ̆ tơring hơtăih hơtŏ. Đe mŏ oh drŏ kăn âu ling lang pơm jŭk yŭk trong hơlâu, iung jang hơdrol lơ̆m pơjing ŭnh hnam hiôk chơt, jang đang ‘lơ̆ng tơdrong jang tơpôl, pơlei pơla... Mă đơ̆ng đe mŏ oh ưh kơ sĭ lai yơ kŭm tơƀơ̆p hiôk ‘lơ̆ng lơ̆m kơplăh bơ̆jang tơpôl, mă lei đĭ đăng dôm tơdrong kiơ mă đe mŏ oh bơngai kon kông hlôi tơgop ăn pơlei pơla Lâm Đồng ‘noh kăl kơ chih iŏk”.