VOV4. Bahnar - Pơgê năr 29/6, Hơnĭh tơm chĭh jô̆ găh Dơnŏ anĭh tơm Pơ prŏ tơdrong jang păng Tơmơ̆t jên jang pơgơ̆r hop akŏm tơbăt kơsô̆ chĭh jô̆ mŭk drăm-tơpôl Jăl 2 păng 6 khei blŭng sơnăm 2022. Kiơ̆ tơbăt, 6 khei blŭng sơnăm, GDP tŏk 6,42% – lơ hlŏh sơnăm 2020-2021 mă lei oei tŏ sĕt pơtêng hăm sơnăm 2019; lơ̆m tĕh đak đei 76.200 hơnĭh mơdro sa apĭnh pơjing, tŏk 13,6%; 602.000 ‘nu tơmoi hlôi năm tơ̆ Việt Nam, tŏk hlŏh vă jê̆ 7 ‘măng pơtêng hăm khei au sơnăm sơ̆; kon jên tĕh đak đe tơmơ̆t jang tŏk kơtang hơtŏ hăm 5 sơnăm au ki... ‘Nau jing tơdrong hơ iă hlŏh kơ hơyak hơmet pơ ‘lơ̆ng mŭk drăm, 6 khei blŭng sơnăm. Hơnĭh tơm chĭh jô̆ sơkơ̆t hơdăh, rŏ năng mŭk drăm Việt Nam gô hơmet pơ ‘lơ̆ng kơtang hlŏh dơ̆ng lơ̆m dôm khei uơ oei kơ sơnăm, tơdrong ‘mĕh vă răt yua tơmam drăm tŏk lơ pơm ăn kơ jă tŏk măt.

Tơblơ̆ nơ̆r: Amazưt