Tơdrong ‘nâu hlôi ƀôh tôch hơiă tơ̆ Đắk Lắk lơ̆m pơyan lêh Sầu riêng âu ki. Tơ̆ dôm xăh Krông Pắch, Ea Knuếc, Cư M’Gar, Krông Búk, Quảng Phú, Ea Tul, Krông Năng, phường Cư Bao păng Anih ming pơdă tơmam OCOP kơ dêh char Đắk Lắk hlôi pơgơ̆r 16 ‘măng livestream lơ̆m Facebook, TikTok Shop păng dôm kơmăy tĕch mơdro hăm  điên tư. Dôm ‘măng livestream sơng đei hlŏh 4 triu ‘nu bơngai lăng, dang 8.700 hla ar apinh răt tơmam đei kĭ pơkăp, hlŏh 146 tân sầu riêng hơdrih đei tĕch mơdro, iŏk yoa dang 11 ti hlak jên.

Tơdrong kăl pơma ‘nŏh, dôm kơsô̆ âu đei tơ̆ dôm bơngai dơ̆ng ƀât hơnăp kơmăy kuay. ‘Nŏh ưh lăp dôm bơngai KOL, KOC (dôm bơngai đei ư hơnhang dăh mă dôm bơngai juăt tĕch tơmam đĕch). Mă lơ kăn ƀô̆, kơdră chĕp kơ̆l xăh, đe đoàn viên druh dăm, anih tĕch mơdro, HTX păng kơdih kâu dôm bơngai pơtăm ‘long kŭm vang pơih tơƀôh lơ̆m mang hai.

Tơ̆ xăh Ea Knuếc, Bí thư Đảng, Kơdră Jơnŭm pơgơ̆r kon pơlei xăh Ngô Thị Minh Trinh vang iung livestream, roi tơbăt păng tĕch sầu riêng ăn kon pơlei. Tơ̆ lơ tơring nai, đe kăn ƀô̆ kŭm vang “pơm” bơngai pơdro, kŭm hăm kon pơlei roi tơbăt groi teh, pơgar ‘long păng tơmam jang đei tơ̆ pơlei pơla.

Gơ̆h pơma, 1 păh khul kăn ƀô̆ tơ̆ tơring oei jing dôm “bơngai tang măt hăm kơmăy sô̆” ăn tơmam choh jang xa đei kơ Tây Nguyên. Tơdrong ‘nâu kŭm ăn ƀôh livestream ưh lăp 1 trong tĕch tơmam đĕch. Kiơ̆ đơ̆ng rim ‘măng kuay hơtŏk, bơngai răt oei gơ̆h lăng ƀôh hloi tơring pơtăm, bơngai pơtăm, trong jang vei rong, nơ̆r tơroi găh tơmam păng tơdrong juăt ‘lơ̆ng đơ̆ng tơring teh Tây Nguyên.

Vă tơgŭm ăn dôm tơ ‘ngla tơmam OCOP hơtŏk trong roi tơbăt păng tĕch mơdro tơmam hăm kơmăy sô̆, ‘nao âu, Anih vei lăng jang Khoa hŏk kơmăy kơmŏk dêh char Đắk Lắk pơgơ̆r pơtâp pơhrăm “Trong livestream tĕch tơmam lơ̆m kơmăy sô̆”, ‘măn ăn anih tĕch mơdro, HTX păng unh hnam tĕch tơmam. Dôm bơngai kiơ̆ hŏk đei roi tơƀôh găh trong tĕch tơmam păng pơjing hơnăn tơmam lơ̆m kơmăy sô̆; trong pơjing trong roi tơbăt tơmam, pơih livestream; pơre nơ̆t tơbăt, pơma nuh, tơl tơblang păng sek tơlang dôm tơdrong kăl mưh tĕch tơmam trư̆k tuyê̆n. Dôm bơngai juăt jang kŭm roi tơbăt trong pơjing um rup kơdih hơdai hăm hơnăn tơmam, iŏk yoa ‘lơ̆ng mang tơpôl, kơmăy tĕch tơmam păng jang kiơ̆ đon tơplih ming hăm kơmăy sô̆ mưh roi tơbăt tơmam OCOP.

Tơdrong pơtâp pơhrăm đei pơgơ̆r hăm 5 ‘măng livestream tơ̆ Anih Tơplih ‘nao rơgei păng 1,2 tơring nhen Tuy Hòa, Tây Hòa, Krông Năng, Buôn Ma Thuột. Kiơ̆ đơ̆ng noh, dôm tơ ‘ngla tơmam đei pơtho tơƀôh trong jang kiơ̆, dar deh pơm hơtŏk đon hlôh vao păng pơjing kênh tĕch tơmam trư̆k tuyê̆n lăp hăm tơmam kơdih đei.

Ƀok Trần Văn Sơn, Phŏ Kơdră Anih jang Khoa hŏk păng kơmăy kơmŏk dêh char Đắk Lắk, ăn tơbăt, đơ̆ng rŏng dôm ‘măng jang pơlong năng, Anih jang vă chih akŏm, hơmet pơ ‘lơ̆ng vă dôm xăh gơ̆h jang kiơ̆, tơlĕch trong jang mă lăp hăm rim tơdrong đei tơ̆ yăn âu.

“Đơ̆ng rŏng kơ jang pơlong năng, nhôn vă chih hơmet rim tơdrong vă dôm xăh gơ̆h tơlĕch jang kiơ̆, kăl loi ‘nŏh athei đei anih jang vang yak hơdoi. Păng anih yak hơdoi ‘nŏh vang năm hơdai hăm dôm xăh vă pơjing dôm anih tĕch tơmam livestream, mă loi jĭ hăm dôm tơmam ‘lơ̆ng, tơmam OCOP đơ̆ng dêh char vă hơnhăk tĕch lơ̆m kơmăy điên tư.”

Mă lei, livestream tĕch tơmam ưh kơsĭ “tơkhoă rơgei” vă tĕch hlot đĭ đăng tơmam jang đei hloi ôh. Mĭnh ‘măng pơih tĕch tơmam gơ̆h hơnhăk ba rơbâu hla ar apinh răt, mă lei vă vei kơjăp bơngai răt, tơmam athei ‘lơ̆ng ‘mơ̆i; athei chih hơdăh anih jang đei ‘mơ̆i; tơdrong tăh lơ̆m tơpu, ‘măn răk, chơ chuĕn athei jang mă ‘lơ̆ng ‘mơ̆i. Hơtăih ƀiơ̆ dơ̆ng ‘nŏh jĭ tơdrong pơjing hơnăn tơmam păng đei trong jang hơdoi kơjăp ‘lơ̆ng./.