Ƀât tŏk bŏk ‘năr dơ̆ng pơyan he tơ̆ plei Bu Bong, xăh Đức An, dêh char Lâm Đồng, “kek kok” jơva gơ gŭ nih nun ƀât hang lơng hnam, yă Thị Hel oei vei sâu, pơih hloi điên thoăi mơ̆ng ngôi tơdrong tơroi pơma nơ̆r M’nông đơ̆ng radio nơ̆r pơma VN. Hăm yă, dôm nơ̆r tơroi lơ̆m radio tôch hơiă, đei yoa hăm unh hnam hai: “Inh hơnơ̆ng mơ̆ng radio. Đei ‘măng mơ̆ng tơroi truh tơdrong 5 ‘nu hơioh lôch glơ̆k, đang kơ ‘nŏh Bơngai pơre nơ̆r athei mih ma duch nă vei lăng kon mon mă ‘lơ̆ng lơ̆m pơyan he, lê̆ ăn kon mon jur hum tơ̆ đak krong hơdrô̆. Inh ƀôh dôm nơ̆r tơtă thoi nŏh kăp gĭt tơpă. Kon drŏ kăn inh pơm Facebook ăn inh, mưh rơhơi inh pơih lăng păng mơ̆ng nơ̆r M’nông đơ̆ng Radio nơ̆r pơma Việt Nam, đei hloi tơdrong tơroi hơ ‘mon, hơri brông, đei video păng ƀơ̆r hơri dôm bơngai inh băt truh. Inh ƀôh hơiă dêh.”

Hăm mŏ Thị Nia (tơ̆ plei Tu Suay, xăh Đức An, dêh char Lâm Đồng), tơdrong tơroi pơma nơ̆r M’nông nhen thoi kơsơ̆p hla ar chih. Mŏ hơnơ̆ng răp mơ̆ng tơdrong tơroi găh vei lăng jơhngâm pran, trong tang găn jĭ pơlŏ sôt ret, jĭ pơlŏ lĕch đe, truh dôm tơdrong pơtho “pơtăm ‘long kiơ, rong yă kiơ” lơ̆m tơdrong jang xa. Radio iĕ jing “boăl juăt” chĕp ba lơ tơdrong hơri brông tôch hơiă tơ̆ tơring bri kông. Mŏ Thị Nia chơt hơiă tơroi: “Inh mơ̆ng radio lơ dêh. Năm tơ̆ mir ‘nŏh điên thoăi, ƀât lăp ưh đei mang kơna inh chĕp ba radio. Ƀât lăp jăng, ƀât lăp ưh, inh athei dui angten mă kơjung, chô̆ kơpal ‘long ‘mơ̆i na mơ̆ng gơ̆h rơđăh. Choh jang răh, mơ̆ng răh radio ƀôh tôch chơt. Tơ̆ hnam inh mơ̆ng păng lăng lơ̆m Facebook. Inh ƀôh trang Facebook M’nông tôch hơiă. Đei video hơri M’nông lơ̆m Facebook ‘nŏh inh kơtĭt like hơnơ̆ng. Inh oei mơ̆ng oh H’Thi tơroi hơ ‘mon M’nông hai. Lăp kăl pơih điên thoăi lăng ‘nŏh đei hloi, lai yơ rơhơi ‘nŏh pơih lăng ngôi.”

Đei bơngai mơ̆ng tơdrong tơroi vă băt trong tang găn jĭ, băt trong jang xa; đei bơngai răp mơ̆ng ƀai hơri, mơ̆ng tơdrong hơ ‘mon; Đei bơngai mơ̆ng vă băt dơ̆ng lơ nơ̆r hơdrĕch kơdih. Tơdrong tơroi nơ̆r M’nông VOV Tây Nguyên hơnơ̆ng truh hăm tơdrong arih xa thoi noh. Mŏ H’Juel Sinur (Bơngai tơblang nơ̆r M’nông, tơ̆ Ƀăo, radio – Pơdăh um rup dêh char Lâm Đồng) pơma: “Đơ̆ng rŏng 1 năr bơ̆ jang, inh tôch ‘mĕh pơih mơ̆ng ngôi tơdrong tơroi nơ̆r M’Nông đơ̆ng radio nơ̆r pơma Việt Nam vă mơ̆ng tơdrong hơri, tơdrong tơroi hơ ‘mon. Lơ ‘măng jur tơ̆ pơlei pơla, mih ma duch nă hơnơ̆ng apinh: ‘Păih đai iĕm ưh đei pơih tơdrong hơ ‘mon, tơdrong hơri brông nhen VOV iiih, pơih noh pơih mơ̆ng hơiă dêh’. Kiơ̆ inh, ‘nŏh jĭ tơdrong jang đei tih đơ̆ng khul jang lơ̆m Tơdrong tơroi pơma nơ̆r M’nông VOV Tây Nguyên, yoa ưh lăp tơroi tơbăt rim tơdrong kăl đĕch mă oei vei kơjăp lơ ƀai hơri brông, tơdrong tơroi hơ ‘mon păng tơdrong juăt, jŏh ayŏ kơ dŏ xoang đơ̆ng kon pơlei lơ̆m radio hai.”

Tơdăh adrol sơ̆ mih ma duch nă athei gô truh jơ pơih ‘mơ̆i mă mơ̆ng radio, ‘nŏh dang ei lăp kăl đei điên thoăi ‘lơ̆ng, nơ̆r M’nông gơ̆h pơih mơ̆ng rim jơ, tơ̆ rim anih. 

Lơ̆m trang Website VOV M’nông păng Fanpage “Tiếng M’nông VOV Tây Nguyên” đĭ tôch juăt hăm mih ma duch nă bơih. Jô̆ păh lăp 1 giĕng, website sơng đei hlŏh 70.000 ‘nu bơngai pơih lăng; Fanpage ‘nŏh đei hlŏh 6.000 ‘nu bơngai răp lăng. Lơ ƀai chih, video đei hơtŏk hăm dôm jĭt rơbâu bơngai đŏk lăng. Dôm kơsô̆ âu ăn ƀôh: tơdrong juăt mơ̆ng brŏ hlôi đei tơplih, mă lei tơdrong ‘mĕh mơ̆ng nơ̆r pơma hơdrĕch kơdih oei hơnơ̆ng đĕch.

Hăm ‘nhŏng Y Sưng Phêja, jang lơ̆m Tơdrong tơroi nơ̆r M’nông VOV Tây Nguyên, tơđrong tơplih ‘noh jĭ đon adrin jang păng druh kiơ̆: “Blŭng a, mưh bơ̆jang pơih pơre lơ̆m lơ kơmăy kơmŏk, tơdrong hŏk pơhrăm dơ̆ng kơmăy kơmŏk ‘nao hăm nhôn ưh đei ƀônh kiơ. Mă lei tơdrong tơplih ‘nŏh kŭm hơnhăk ba lơ tơdrong ‘lơ̆ng ƀiơ̆, tơgŭm ăn tơdrong tơroi nơ̆r M’nông truh jê̆ ƀiơ̆ hăm bôl boăl mơ̆ng brŏ. Inh tôch hơiă mưh bơ̆ jang kiơ̆ trong ‘nao âu, yoa ưh lăp tơroi lơ̆m Radio đĕch mă oei pơih tơroi hăm nơ̆r M’nông, tơroi dôm tơdrong juăt ‘lơ̆ng đơ̆ng bơngai M’nông lơ̆m mang hăm lơ bơngai mơ̆ng ƀiơ̆, mă loi jĭ đe druh dăm sơnăm mơlôh. Hăm inh ‘nau jĭ tơdrong hơiă hai, tơdrong athei kơdih kâu adrin hlŏh hai vă rim năr bơ̆ jang roi gơ̆h hơgei ƀiơ̆.”

Hơnơ̆ng yak hơdoi hăm dôm tơdrong adrin ‘nŏh jĭ jơhngâm đon ‘mêm băt đơ̆ng bôl boăl mơ̆ng brŏ gơih kiơ̆ nơ̆r chih lơ̆m Fanpage nơ̆r M’nông. Facebook Điểu Chí Jam chih nơ̆r pơma thoi âu: “Lơ ƀai hơri brông hơiă dêh, lêh ‘nau tơ̆ yơ mă hơiă lơ loh koh bôl boăl... Iĕm pơih hơtŏk lơ tơdrong hơri, tơdrong tơroi M’nông lơ̆m Facebook dơ̆ng hơ, mơ̆ng hơiă dêh!”

Facebook Điểu Ntri ‘nŏh pơtruh nơ̆r pơlung: “’Nhŏng oh hơdrin hơ, bơ̆ jang mă ‘lơ̆ng vă đe băt bơngai M’nông bơ̆n đei lơ tơdrong juăt ‘lơ̆ng. Bơ̆n vang adrin vă gơ̆h chĕp vei nơ̆r pơma bơ̆n. Tơdrong tơm ‘nŏh vă vei kơjăp nơ̆r pơma, roi tơbăt dôm tơdrong juăt ‘lơ̆ng, inh ƀôh hơiă tơpă!”

Dôm nơ̆r pơlung thoi noh đei gơih ăn Tơdrong tơroi nơ̆r M’nông đơ̆ng radio nơ̆r pơma Việt Nam nhen tưk tơiung dơ̆ng jơhngâm hưch hanh đơ̆ng rŏng 20 sơnăm pơih pơre. Ƀok Y Thịnh Bon Yôk Ju, sơ̆ pơm Phŏ Kơdră vei lăng kon pơlei dêh char Đắk Nông, bơngai đei lơ sơnăm tơchĕng hơlen tơdrong juăt, jŏh ayŏ kơ dŏ xoang kơ bơngai M’nông, pơma: “Ưh lăp hăm druh dăm đech ôh, mă dôm bơngai tơhnơr nhôn, chăl 6x, 7x, kŭm yoa Facebook, Zalo, YouTube vă pơih lăng, mơ̆ng tơdrong kơtơ̆ng ang, năng đe hơri hơxoang dăh mă mơ̆ng ngôi dôm tơdrong tơroi hăm nơ̆r M'nông. Yoa thoi noh, ‘ngoăih kơ tơdrong tơroi hăm radio, tơdrong tơroi nơ̆r M'nông athei pơih lơ̆m lơ kơmăy kơmŏk hai vă kon pơlei lơ̆m teh đak kŭm nhen tơ̆ teh đak đe băt. Hơdai hăm ‘nŏh khul jang athei druh kiơ̆ kơmăy kơmŏk ‘nao hai, đei hloi kơmăy AI, pơm thoi yơ vă gơ̆h đei tơdrong tơroi roi hơiă. Mă lei, mă tơplih thoi yơ tơdrong kăl hlŏh ‘nŏh athei tơroi mă trŏ, vei kơjăp nơ̆r pơma, tơdrong juăt păng dôm kơjă kăp gĭt đơ̆ng sơ̆ kơ bơngai M'nông. Hơpơi đe kon mon adrin, ‘mêm tơdrong jang, jur tơ̆ pơlei mă lơ ƀiơ̆, jê̆ kon pơlei ƀiơ̆, hơnơ̆ng hŏk pơhrăm păng tơplih ‘nao tơdrong tơroi vă nơ̆r M’nông gơ̆h păr ang jơ̆p jang kiơ̆ kơmăy kơmŏk ‘nao. Inh lui, mưh nơ̆r M'nông đei pơih hơnơ̆ng lơ̆m radio păng dôm kơmăy sô ‘nŏh tơdrong juăt ‘lơ̆ng đơ̆ng hơdrĕch bơ̆n gô đei vei kơjăp truh ning mônh."

20 sơnăm – mă đơ̆ng pơih lơ̆m radio dăh mă kiơ̆ đơ̆ng dôm video kơđeh tơ̆ Facebook, website..., nơ̆r M’nông VOV Tây Nguyên oei pơih đei lơ trong yak ‘nao vă gơ̆h truh hăm pơlei pơla. Hăm đon jang tơnăp dôm bơngai chih tơblang, pơre nơ̆r păng tơdrong vang yak hơdoi đơ̆ng bơngai mơ̆ng, nơ̆r pơma, chư chih păng dôm tơdrong juăt ‘lơ̆ng đơ̆ng sơ̆ kơ bơngai M’nông gô hơnơ̆ng đei chĕp vei, păr ang rim năr lơ̆m tơdrong arih xa hrei ‘nâu.