Hnam trưng Mầm non Krông Bông, xăh Krông Bông, dêh char Đắk Lắk đơ̆ng rŏng kơ tơmơ̆t hơdai đei 1 hnam trưng tơm, 2 hnam hŏk păng 3 hnam hŏk iĕ hăm 515 ‘nu hơioh. Tơdrong vei hŏk tro, kô pơtho tơ̆ dôm hnam trưng so tơgŭm pơm dă ƀiơ̆ kơ tơsŭl tơsăl, mă lei ‘noh tơlĕch ăn ƀai toan vei lăng 1 hnam trưng hŏk lơ̆m 1 tơring să, hŏk tro răh rai. Yă  Lê Thị Thuý Nga, Kơdră vei lăng hnam trưng roi tơbăt:

“Hnam pai sa tơ̆ hnam hŏk Măng Non 'nŏh pơtruh tơmam sŏng sa ăn 2 hnam trưng, kơna gô đei tơdrong chơ tơmam sa truh mĭnh hnam hŏk le nai. Hnam hŏk Họa Mi 'nŏh mĭnh hnam pai sa  pơtruh tơmam sŏng sa ăn mĭnh hnam hŏk păng 2 hnam hŏk le, kơna kŭm tơƀơ̆p mơmat tat lơ̆m tơdrong  chơ tơmam sa ăn kơ hŏk tro đơ̆ng jên vang tơgop đơ̆ng mĕ ƀă.”

Mưh minh hnam trưng đơ̆ng rŏng kơ proh hơmet đei lơ hnam hŏk, ‘meh vă vei lăng, pơgơ̆r pơtho pơhrăm ưh gơh lăp jô̆ kiơ̆ kơsô̆ đơ̆ng hnam trưng tơm. Tơ̆ Hnam trưng Jăl mônh Nguyễn Du, phường Tân Lập, dêh char Đắk Lắk, tơdrong ‘meh vă hơmet ăn bơngai vei lăng tơdrong jang Đội tơ̆ dôm hnam hŏk ‘noh jĭ 1 pơtih gia. Yă Nguyễn Thị Hương, kơdră vei lăng hnam trưng tơbăt dang ei athei hơmet ăn thây kô pơtho jang hơdai:

“Tơdrong tih hloh đơ̆ng dôm hnam trưng dang ei tŏk bŏk đei ƀơm truh 'noh jĭ ưh kơ măh mĭnh 'nu bơngai vei lăng joăt jang vă pơvih ăn tơdrong bơ̆jang kơ hnam trương tơ̆ lơ hnam hŏk mă tơdrong kăl 'noh jĭ athei đei tơdrong joăt jang, gơh hơgei. 'Noh dang ei 'noh jĭ dôm hnam trưng tŏk bŏk jing chă pơklep, vă khan iŏk đơ̆ng thây kô môn ‘nâu dăh mă thây kô jăl mônh lĕch vă jang. Mă tơpă ‘noh vă đei mĭnh 'nu thây kô akŏm vei lăng ‘noh tam mă đei. Jô̆ hloi thây kô pơtho hơri hơsoang lĕch jang dang ei kŭm mă pơm lăp đei tơdrong ‘noh”.

Đơ̆ng rŏng proh hơmet ƀar jăl hŏk jăl mônh păng jăl ƀar, Hnam trưng Jăl mônh - jăl 2 Quang Trung, xăh Krông Bông, dêh char Đăk Lăk tŏk bŏk đei tôm lăm hŏk ăn 19 lăm mă lei ưh kơ măh lơ lăm jang, lăm pơhrăm tơƀôh yan âu. Ƀok Nguyễn Viết Bá Hoàng, kơdră vei lăng hnam trưng tơbăt, mă đơ̆ng hnam trưng đei pơjao dơ̆ng anih jang đơ̆ng minh ƀar anih jang so vă pơih să anih jang, mă lei ưh kơ đei pơm lăp hăm đei ‘meh vă.

“Đĭ đăng lăm bơ̆ jang kơ Anih vei lăng kon pơlei tơring dang ei nhôn lăp iŏk yua pơm dôm hơnĭh pơvih pơvăn dăh mă hơnĭh bơ̆jang hanh chĭnh đĕch. Tơdăh asong ăn jên dăh mă trong jang thoi vă nhôn teng hŭt iŏk teh vă tơmơ̆t jên jang hơnơ̆ng dơ̆ng. Oei dang ei tơdăh ưh kơ đei teh đơ̆ng anih vei lăng kon pơlei xăh so ‘noh nhôn ư̆h kơ gơ̆h jang kiơ ôh. Dang ei nhôn ư̆h kơ đei mĭnh hơnĭh pơtho pơtâp jơhngơ̆m jăn hơyơ kơdĭh hloi.”

Hơdai hăm dôm tơdrong ƀơm truh đunh đai, kơplăh tơplih jing tơdrong jang 'nao oei đei ƀôh dôm tơdrong tơhlăk găh hla ar ƀơ̆t lăp. Mĭnh ƀar hnam trưng athei pơm dôm hla ar ƀơm truh mã kơsô̆ thuê̆, mã pơkăp anih jang păng ‘long đŏng yŏu. Tơdrong hiơ̆ pơm đang dôm hla ar âu gô ƀơm ưh kơ 'lơ̆ng truh tơdrong jang, jên hu păng tơdrong jang đơ̆ng hnam trưng. Yă Bùi Lan Anh - Kơdră vei lăng Hnam trưng jăl 2 Nguyễn Chí Thanh, phường Tân Lập roi tơpăt:

“Hnam trưng nhôn 'noh Trần Bình Trọng tơmơ̆t hơdai hăm Nguyễn Chí Thanh jing Hnam trưng Nguyễn Chí Thanh. Mĭnh anih jang 'nao pơjing 'noh jĭ athei đei mã kơsô̆ thuê̆ 'nao păng kơsô̆ pơkăp anih jang 'nao. Kŏng an kŭm athei 'noh thoi noh, pơđĭ ƀar anih jang so athei tăh kơsô̆ thuê̆ păng pơm dơ̆ng kơsô̆ pơkăp 'nao 'noh Kŏng an mă ăn kơ nhôn pơm ‘long đŏng yŏu 'nao. Thoi noh truh hloh 1 puăt khei kơ âu nhôn hlôi nôp ‘long đŏng yŏu bơih, bơ̆jang ‘noh ưh kơ đei tơdrong trŏ kiơ lơ̆m khei 'năr âu ki".

Gơ̆h ƀôh, đơ̆ng rŏng proh hơmet dôm anih pơtho pơhrăm ƀai toan tơlĕch ăn anih pơtho pơhrăm Đắk Lắk ưh khan lăp hơmet ming dơ̆ng hnam trưng, lăm hŏk đĕch, mă athei jô̆ trŏ jên jang ăn kơ rim tơdrong jang hnam trưng, rim hnam hŏk păng hơnih hŏk; hơdai hăm hơ met pơ ‘lơ̆ng dôm ưh kơmăh găh bơngai jang, lăm bơ̆jang, tơmam păng anih pơyoa ăn pơtho hŏk. Tơjur anih jang lăp jing pơtôch đơ̆ng kơplăh proh hơmet. Iŏk yua tơpă đơ̆ng tơdrong jang âu gô đei tơƀôh tơ̆ jăl jang đơ̆ng rŏng, ƀơ̆t dôm hnam trưng nao bơ̆jang sơđơ̆ng, tơdrong ‘lơ̆ng pơtho pơhrăm đei vei sơđơ̆ng păng hŏk tro tơ̆ dôm hnam trưng phara băl tă kơ đei tơdrong hiôk gơh yua dôm tơdrong ‘lơ̆ng pơtho hŏk hơtŏ băl ngăl.