Hrei ‘nâu 1 năr, Anih chă tơmang lăng Bàu Trắng U păng ME, xăh Hòa Thắng, dêh char Lâm Đồng sơng đei đơ̆ng 3.000 - 4.000 ‘nu bơngai truh tơmang lăng, phĭn rup păng pơm ngôi tơ̆ groi teh chuơh kok xă hlŏh 2ha. Ƀok Nguyễn Văn Hùng – Kơdră pơgơ̆r Anih chă tơmang lăng ăn tơbăt, đơ̆ng tơmât hơdai dêh char truh dang ei, kơsô̆ tơmoi tŏk dang 20% păng gô tŏk lơ hlŏh dơ̆ng mưh pơm đáng ‘lơ̆ng trong tơƀưh đơ̆ng tơring đak dơsĭ chuơh kok truh tơ̆ tơring pơkao ‘lơ̆ng rŏ Đà Lạt:

“Đơ̆ng tơmât hơdai dêh char truh dang ei đei hloi bri kông, đak dơsĭ păng chuơh kok ‘nŏh jĭ 1 tơdrong ‘lơ̆ng tôch tih vă bơ̆n jang hơdoi tơmât yoa rim tơdrong ‘lơ̆ng lơ̆m dêh char. Kăl hlŏh jĭ tơdrong pơm trong tơƀưh vă tơmoi chă tơmang lăng yak hiôk hian hlŏh đơ̆ng đak dơsĭ tŏk tơ̆ tơring pơkao păng tơring pơkao jur tơ̆ đak dơsĭ. Mă tơpă, công ty hlôi hue lăng truh trong jang hơdoi đơ̆ng dôm anih chă tơmang lăng, mă loi jĭ anih chông tơmoi tơmang lăng pơjing dôm tơdrong tơgŭm mưh truh tơ̆ Đà Lạt dăh mă jur tơ̆ đak dơsĭ”.   

Jơ̆p lơ̆m dêh char dang ei đei hlŏh 4.200 anih tep pơdơh, vă jê̆ 1.400 tŏ hnam hotel đơ̆ng 1 - 5 sơnglŏng, kĕ sơng 48 triu ‘nu tơmoi lơ̆m 1 sơnăm. Hơdrô̆ lơ̆m sơnăm 2025, dêh char vă sơng 23 triu ‘nu tơmoi chă tơmang lăng. Kiơ̆ Tiến sỹ Phan Bảo Giang, Phŏ Hiê̆u trơng pơm hloi Kơdră vei lăng khoa Marketing Hnam trưng Đại học Kinh tế Tài chính plt Hồ Chí Minh, đơ̆ng 2025-2030, mưh chih hơdăh đei dôm tơdrong ‘lơ̆ng, dôm tơdrong juăt tơ̆ dôm tơring, atŭm hăm ‘nŏh tơguăt ‘lơ̆ng hăm anih tĕch mơdro, chă tơmang lăng Lâm Đồng gô jing tơdrong jang mŭk drăm tơm tơpă:

“Bơ̆n athei chih tơlĕch đei lakak tơƀôh ăn tơmoi rim anih chă tơmang lăng tơ̆ dêh char Lâm Đồng ‘nao. Bơ̆n ƀôh rim tơring đơ̆ng Đắk Nông, Lâm Đồng, truh tơ̆ Bình Thuận so đei lơ style pha ra băl kơna lơ̆m 1 tơdrong jang tih thoi âu bơ̆n athei mât 1 ƀơ̆r đon, vang bơ̆jang ‘nŏh inh lui rim tơdrong pơmat tat gô đei yak hlŏh”.

Kiơ̆ hla ar chih tơroi lơ̆m Hop akŏm Đảng ƀô̆ dêh char Lâm Đồng ‘măng mă 1, jăl jang 2025 – 2030, Chă tơmang lăng jĭ 1 lơ̆m 3 tơdrong jang mŭk drăm tơm gĭt kăl đơ̆ng dêh char, hơdai hăm choh jang xa hăm kơmăy kơmŏk ‘nao păng jang kơmăy, ming man. Ƀât mă tơdrong pơjei băl roi đunh roi dêh, Lâm Đồng năng kăl truh tơdrong pơjing tơmam chă tơmang lăng ‘lơ̆ng hơiă, hơtŏk tơdrong iŏk yoa kơmăy sô̆ lơ̆m tơdrong tơroi tơbăt păng vei lăng, atŭm hăm ‘nŏh hơtŏk tơdrong jang hơdoi đơ̆ng teh đak păng kon pơlei vă sơng iŏk jên jang, jang tŏk pran kơjăp tơdrong jang kơmăy ưh kơ đei ‘nhui âu.

Ƀok Nguyễn Văn Lộc, Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Lâm Đồng akhan, tơdrong kăl hlŏh jĭ tơdrong vang jang hơdoi đơ̆ng anih tĕch mơdro. Tơdăh jang tơmang lăng mă ưh đei anih tĕch mơdro ‘nŏh ưh jor jang xa ưh đei: “Mĭnh tơdrong tôch gĭt kăl ‘nŏh jĭ tơdrong vang yak hơdoi hăm anih tĕch mơdro. Tơdăh jang chă tơmang lăng mă ưh đei tơdrong yak hơdoi đơ̆ng anih tĕch mơdro ‘nŏh jang ưh kơ đei ôh. Anih joh ayŏ kơ dŏ xoang, tơplŏng kơdâu păng chă tơmang lăng nhôn pơkăp vă yak hơdoi hăm anih tĕch mơdro vă bơ̆n vang yak hơdoi jang tŏk. Dôm anih tĕch mơdro tơgŭm ăn tơring lơ̆m tơdrong pơjing ming man, roi tơƀôh um rup đơ̆ng 1 tơdrong chă tơmang lăng ‘lơ̆ng tơ̆ Lâm Đồng ‘nao”.

Năm truh tơdrong jang atŏk tơiung chă tơmang lăng ‘lơ̆ng hơiă, dêh char Lâm Đồng oei akŏm jơhngâm tơmât jên jang, pơjing dôm anih chă tơmang lăng tih kơ teh đak păng apŭng plenh teh nhe Dơnâu Tuyền Lâm, Mũi Né, Tà Đùng, tơklep hăm dôm tơmam chă tơmang lăng đei hơdrô̆ tơ̆ tơring nhen: chă tơmang lăng tơ̆ bri brăh, truh pơdơ̆h ngôi, tơplŏng kơdâu, chă tơmang lăng tơ̆ anih choh jang xa, mơ̆ng nhak, vei lăng jơhngâm pran păng truh lăng tơdỏng joh ayŏ kơ dŏ xoang kon kông. 

Ƀok Hồ Văn Mười, Phó Bí thư Đảng dêh char, Kơdră vei lăng kon pơlei dêh char Lâm Đồng, ăn tơbăt, vă Lâm Đồng jing anih tơm chă  tơmang lăng ‘lơ̆ng, tơdrong kăl hlŏh athgei tưk tơiung dôm tơdỏng pran ‘lơ̆ng tih tên đơ̆ng 3 tơring: “Pơkao, bri kông păng đak dơsĭ”:

“Tơdrong ‘lơ̆ng đơ̆ng bơ̆n tôch tih, pơih xă trong jang truh ning mônh kơnh. Đon tơchĕng tôch gĭt kăl, jang tŏk pran, gơ̆h hơgei. Tơring bri kông, tơring đak dơsĭ păng tơring pơkao nhen thoi gâu gŏ, tôch kơjăp mă lei gâu gŏ âu tam mă hơnơ̆ng. Vă kơsô̆ tơmoi chă tơmang lăng truh lơ, lơ hlŏh kơsô̆ bơ̆n tơlĕch ‘nŏh athei vei lăng ‘lơ̆ng tơdrong sơđơ̆ng. Pơm ‘lơ̆ng găh trong yak vih vât, đang kơ ‘nŏh jĭ jơhngâm pran, vei sơđơ̆ng ăn tơmoi chă tơmang lăng. Rim kon pơlei jĭ rim bơngai tơƀôh trong chă tơmang lăng. Dôm anih chă tơmang lăng ling lang chĕp vei ƀơ̆r hiĕk, ling lang đei jơhngâm đon ‘mêm băt kơ tơmoi”.

Hăm trong jang đunh đai gĭt kăl, đon pơhnŏng tôch ai đơ̆ng khul kơdră tơring, tơdrong vang yak hơdoi đơ̆ng anih tĕch mơdro păng kon pơlei, Lâm Đồng dar deh bơ̆ jang kiơ̆ tơdrong hơmĕng tŏk jing tơring chă tơmang lăng tơm, ‘lơ̆ng hơiă, tơgop gĭt kăl ăn tơdrong jang tŏk mŭk drăm – tơpôl ăn jơ̆p tơring Tây Nguyên păng teh đak. Chă tơmang lăng Lâm Đồng – đơ̆ng tơdrong ‘lơ̆ng truh đon hơmĕng jang tŏk pran oei tŏk bŏk lơ̆m dôm hơyak tŏk ‘nao lơ̆m mĭnh chăl plơ̆ng./.