Tơ̆ tơring sơlam Đắk Lắk, sơnăm hŏk ‘nâu đei 1 tơdrong hơiă kăl kơ lăng truh: dôm hnam trưng teh đak rong 2 jăl đei tơmơ̆t jên jang ming man tŏk bŏk ƀrư̆ ƀrư̆ tơmơ̆t lơ̆m iŏk yua, pơm tơdrong hiôk hŏk pơhrăm, oei sa ‘lơ̆ng hloh ăn hŏk tro tơring sơlam. Pêng hnam trưng teh đak rong 2 jăl tơ̆ dôm xăh Ia R’vê, Ia Lốp păng Buôn Đôn đei tơlĕch jang hăm tơdrong hơgăt sơng hloh 3.000 ‘nu hŏk tro lơ̆m sơnăm hŏk 2026-2027. ‘Nâu jĭ dôm hnam trưng đei tơmơ̆t jên jang hrơ̆ch, ưh khan lăp đei lăm hŏk mă oei đei hơnih ƀĭch oei sa kơtă, thư viện,  hnam pơtâp hơkâu jăn păng dôm hơnih pơyua ăn oei sa kơ hŏk tro.

Hơdrô̆ Hnam trưng teh đak rong Ia R’vê đei jên tơmơ̆t jang 185 ti hlak jên. Vă tơtom ăn hnam trưng tơmơ̆t iŏk yua, dôm jĭt ‘nu kang ƀô̆, khŭl linh kŭm hăm kŏng nhơ̆n hlôi vang jang, bơ̆jang hơnơ̆ng tơ̆ hơnih jang. Vih tơmang hnam trưng lơ̆m năr sơnbăm hŏk ‘nao, Thượng tướng Phùng Sĩ Tấn, Phŏ Kơdră jang tơgŭm Khŭl lĭnh kon pơlei Việt Nam tơbăt, hnam trưng ‘noh jĭ tơƀôh ăn tơdrong ‘lơ̆ng đơ̆ng tơdrong ‘mêm linh hăm kon pơlei:

“Quân ủy Trung ương, Anih tơm vei lăng khŭl linh, Khŭl linh lui ngeh akhan ƀơ̆t đei hnam trưng hŏk gô pơm lăp hăm ‘meh vă bơngai jang hơgei pơtho pơhrăm kang ƀô̆ bơngai kon kông. Kiơ̆ đơ̆ng ‘noh gô rơih hơmet kang ƀô̆, pơm tơdrong ‘lơ̆ng vă kơ bơ̆n bơ̆jang kiơ̆ ‘lơ̆ng hơnăp jang hơtŏk tơiung mŭk drăm tơpôl, hơmet ăn tơdrong sơđơ̆ng, mă loi ‘noh jĭ tơring oei lơ mơmat tat nhen Ea Rốk.”

Dôm kơsô̆ ‘noh, tơdăh lăp lăng tơ̆ hla ar, gô lăp jing kon jên tơmơ̆t jang dăh mă kơsô̆ hŏk tro đĕch. Mă lei tơ̆ rŏng ‘noh jĭ tơdrong tơroi kơ dôm đe hơioh tơring sơlam. Hăm lơ oh, đei hŏk pơhrăm lơ̆m 1 hnam trưng ‘lơ̆ng, đei hơnih oei sa kơtă hloi tơ̆ hnam trưng vă khan hơdai hăm tơdrong jăl trong truh tơ̆ lăm hŏk dă ƀiơ̆ kơ hơtăih ƀiơ̆, tơdrong hŏk pơhrăm sơđơ̆ng ƀiơ̆ păng tơdrong hiôk gơh pơtho pơhrăm kŭm pơih să ƀiơ̆.

Păng tơdăh tơ̆ tơring sơlam, dôm hnam trưng ‘nao tŏk bŏk pơih dơ̆ng tơdrong hiôk ăn hơioh, ‘noh tơ̆ Trường Sa, mĭnh lăm hŏk ‘noh hơnhăk ăn 1 tơdrong ‘lơ̆ng gĭt kăl. Tŏk bŏk đak dơsĭ să sap, thây păng hŏk tro oei sơng sơnăm hŏk ‘nao nơ̆r hơgơ̆r re mơ̆t hŏk blŭng. Dôm lăm hŏk hơnih achon đak dơsĭ ưh khan lăp jing hơnih pơtho tơdrong hlôh vao, mă oei jing dôm hơnih hơdăh tơƀôh tơdrong hơrih đơ̆ng kon pơlei Việt Nam hơnih achon đak dơsĭ kơ Teh đak.

Đơ̆ng Tây Nguyên truh Trường Sa, hơtăih băl kơhrĕng, rơbâu kilômet. Tơdrong hŏk pơhrăm kŭm pha ra băl. Mă lei lơ̆m năr mơ̆t hŏk blŭng, đĭ đăng vang hơdai 1 tơdrong; rim hơioh, mă đơ̆ng tơ̆ sơlam teh đak dăh mă achon đak dơsĭ, tă kơ kăl đei pơjao tơdrong hiôk hŏk pơhrăm păng hơtŏk tơiung ngăl.

Păng yua thoi noh, hơgơ̆r re mơ̆t hŏk blŭng sơnăm ‘nâu ưh khan lăp roi tơbăt 1 sơnăm hŏk ‘nao. ‘Noh jĭ hơgơ̆r re đơ̆ng dôm hnam trưng ‘nao tơring sơlam; kơ dôm lăm hŏk tŏk bŏk đak dơsĭ; kơ tơdrong tơmơ̆t jên jang ăn kon bơngai păng kŭm jing tơdrong pơm hơtŏk tơ̆ hơnăp kơnh tơ̆ dôm tơring tôch gĭt kăl kơ teh đak.

Đơ̆ng pơlei pơla Tây Nguyên truh achon đak dơsĭ Trường Sa, dôm trang hla ar chih ‘nao đei pơih ăn. Kŭm hăm ‘noh jĭ dôm tơdrong hơpơi ‘meh ‘nao đơ̆ng 1 jơhnơr tŏk bŏk tih vơ̆ tơ̆ tơring sơlam kơ Teh đak.