VOV4.Bahnar - Pơgê năr 7/2, hơdrol năr bơ̆ jang blung a lăp đơ̆ng rŏng jơ ‘năr pơdơ̆h Têt Nguyên đán Nhâm Dần, Kơ iĕng Thủ tướng Phạm Bình Minh atŭm hăm rim Kơ iĕng Thủ tướng: Lê Minh Khái, Vũ Đức Đam, Lê Văn Thành hlôi tơ ƀơ̆p mŭh măt kang ƀô̆, bơngai jang Dơnŏ anĭh bơ̆ jang ăn Khŭl kơdră chĕp pơgơ̆r Tĕh đak. Iung pơma tơ̆ jơ tơ ƀơ̆p mŭh măt, Ƀlep lơ̆m blŭng Puih mak ‘nao, tang măt ăn Khŭl kơdră chĕp pơgơ̆r Tĕh đak, Kơ iĕng Thủ tướng Phạm Bình Minh hôn bơnê dôm tơdrong jang jơnei, tơgop gĭt kăl đơ̆ng Dơnŏ anĭh bơ̆ jang ăn Khŭl kơdră chĕp pơgơ̆r Tĕh đak hăm rim tơdrong bơ̆ jang đơ̆ng Khŭl kơdră chĕp pơgơ̆r Tĕh đak, Thủ tướng Tĕh đak; Hmach ăn pơ đĭ khŭl kang ƀô̆, bơngai jang sơnăm ‘nao pran jăng grăng akau, hơnŭk hơnoa păng hơnơ̆ng iung jang iŏk đei jơnei hlŏh dơ̆ng lơ̆m rim tơdrong bơ̆ jang. Sơnăm 2022 jing sơnăm mă 2 tơlĕch jang kiơ̆ Trong pơ prŏ jang atŏk tơ iung mŭk drăm-tơpôl 2021-2025 păng Tơdrong jang hơmet pơ ‘lơ̆ng păng atŏk tơ iung mŭk drăm kơna tơdrong jang jĭ tôch kơ lơ, kơ yuơ lơ lŏh, Kơ iĕng Thủ tướng ‘mĕh vă rim hơnĭh bơ̆ jang păng rim kang ƀô̆, bơngai jang kơ Dơnŏ anĭh bơ̆ jang ăn Khŭl kơdră Tĕh đak iung jang tơnăp kơtang hloi đơ̆ng blŭng sơnăm ‘nao.

Tơblơ̆ nơ̆r: Amazưt