VOV4.Bahnar - Hơnơ̆ng pơgơ̆r hop akŏm mă 13, pơgê năr au, năr 12/7, Dơnŏ anih chĕp pơgơ̆r Kuô̆k hô̆i pơgơ̆r Hop akom pơtôch ‘măng hop akom mă 13 păng ăn tơgop nơ̆r ‘măng blŭng hơmet ăn ‘Măng hop akŏm mă 4, Kuô̆k hô̆i jăl XV. ‘Măng hop akŏm mă 3, Kuô̆k hô̆i hlôi pơdrơ̆ng kiơ̆ 5 khôi luơ̆t, 17 Tơdrong tơchơ̆t; ăn tơgop nơ̆r găh 6 tơdrong vă pơjing khôi luơ̆t anai păng  tơchơ̆t lơ tơdrong kăl ư̆h khan lăp hơdrô̆ sơnăm 2022 mă lei pơ đĭ lơ̆m jăl jang 2021-2025 păng rim sơnăm đơ̆ng rŏng dơ̆ng. Găh hơmet ăn ‘Măng hop akŏm mă 4, Kơdră chĕp pơgơ̆r Kuô̆k hô̆i Vương Đình Huệ tơbăt: ‘Măng hop akŏm ăn tơgop nơ̆r blŭng a găh hơmet ăn ‘măng Hop akŏm mă 4 gô đei pơgơ̆r lơ̆m khei 10 sơnăm au. Tơ̆ hop akŏm au, tơdrong tơm ‘nŏh pơjing khôi luơ̆t, lăng hơlen lơ tơdrong vă pơjing khôi luơ̆t, ăn tơgop nơ̆r blŭng a adoi nhen lơ tơdrong vă pơjing Khôi luơ̆t. Hăm bơ̆ jang hơmet ăn pơjing khôi luơ̆t lơ lơ lau ‘noh bơ̆ jang hơmet ăn, iung jang hơdoi hăm Khŭl kơdră chĕp pơgơ̆r Tĕh đak lơ̆m pơm tơm chĭh tơlĕch, hơnĭh jang dăr lăng, trong pơgơ̆r lơ liơ vă ‘măng hop akŏm mă 4 bơ̆ jang ƀlep khei ‘năr pơkă păng iŏk jơnei hơ iă hlŏh.

Tơblơ̆ nơ̆r: Amazưt