VOV4.Bahnar - Hơnơ̆ng hop akŏm mă 11, năr au, năr 12/5, Dơnŏ anih chĕp pơgơ̆r Kuô̆k hô̆i ăn tơgop nơ̆r găh tơdrong Kuô̆k hô̆i lăng hơlen, tơchơ̆t trong jang tơmơ̆t jên jang găh Tơdrong vă jang pơm trong Ver 4 tơring Hơnĭh tơm Hà Nội; Tơdrong vă jang trong Ver 3 pơlei tơm Hồ Chí Minh. Tơdrong vă jang trong Ver 4 tơring Hơnĭh tơm Hà Nội atăih 112,8 km hăm akŏp kon jên tơmơ̆t jang 85.813 tii hlak jên. Tơdrong ‘mĕh vă iok tĕh pơm trong au dang 1.341 ha. Jăl trong Ver 4 đei pơm să đơ̆ng 90 trŭh 135m. Khŭl kơdră tĕh đak pơjao ăn Dơnŏ anĭh vei lăng kon pơlei kơ pơlei tơm Hà Nội pơm tơngla pơgơ̆r jang kiơ̆, sơđơ̆ng iung jang. Tơdrong vă jang pơm trong Ver 3 pơlei tơm Hồ Chí Minh đei kon jên tơmơ̆t jang hlŏh 75.300 ti hlak jên yak hlŏh pơlei tơm Hồ Chí Minh, Đồng Nai, Bình Dương, Long An akŏp atăih vă jê̆ 92km. Trong au jing găh rim tơdrong jang kăl kơ Tĕh đak, jang kiơ̆ đơ̆ng sơnăm 2022 trŭh sơnăm 2027.

Tơblơ̆ nơ̆r: Amazưt