VOV4.Bahnar - Pơgê năr 27/6, ƀok Trần Quang Phương, Kơ iĕng Kơdră chĕp pơgơ̆r Kuô̆k hô̆i hlôi bơ̆ jang hăm kơdră dêh char Khánh Hòa găh bơ̆ jang xek tơlang tơdrong tơkêng.

Rup jơ bơ̆ jang

Kiơ̆ tơbăt, đơ̆ng sơnăm 2016-2021, tơdrong tơkêng lơ̆m dêh char Khánh Hòa tŏk hlŏh 150% pơtêng hăm 5 sơnăm hơdrol. Khei năr au đei hlŏh 6.600 hla bơar tơkêng, lơ̆m au 70% ‘nŏh hla bơar tơkêng hơlơ̆k, pă dôm yơ ‘nŏh tơkêng. Tơdrong tơm ‘nŏh dêh char Khánh Hòa tŏk bŏk jang kiơ̆ lơ tơdrong vă jang tĭh, kơsô̆ ŭnh hnam, hơgăt tĕh đei ƀơm trŭh lơ mă lei tơdrong tơchơ̆t găh tơgŭm ăn, hrŭ ăn tă tim mă ƀlep hăm yan au. Lơ̆m mă nŏh, bơ̆ jang tĕh đak kơ khŭl kơdră tơring tim mă kơ jăp; mĭnh ƀar hơnĭh bơ̆ jang xek tơlang hla bơar tơkêng đơ̆ng kon pơlei tim mă tơtom. Jăl jang 2016-2021, dêh char Khánh Hòa hlôi sơng đei 13.000 ‘nu kon pơlei, hăm vă jê̆ 9.800 tơdrong, lơ̆m au đei 133 khŭl lơ bơngai, tơdrong tơkêng lơ bơngai tôch mơmat.

Tơblơ̆ nơ̆r: Amazưt