VOV4.Bahnar - Pơgê năr 11/7, pơgơ̆r blŭng a Hop akŏm mă 13 kơ Dơnŏ anĭh chĕp pơgơ̆r Kuô̆k hô̆i . Iung pơma pơgơ̆r blŭng a hop akŏm, Kơdră chĕp pơgơ̆r Kuô̆k hô̆i Vương Đình Huệ tơbăt, ‘măng hop akŏm au, Dơnŏ anĭh chĕp pơgơ̆r Kuô̆k hô̆i gôhơ len hơdăh ‘măng hop akŏm mă 3 păng ăn tơgop nơ̆r găh hơmet ăn ‘măng hop akŏm mă 4 kơ Kuô̆k hô̆i.

Rup hop akom

‘Măng hop akŏm jei ăn tơgop nơ̆r găh hơmet ăn ‘măng hop akŏm mă 4 gô đei pơgơ̆r lơ̆m khei 10 sơnăm au. Tơdrong tơm hop akŏm ‘măng mă au ‘nŏh bơ̆ jang pơjing khôi luơ̆t, lăng hơlen pơdrơ̆ng kiơ̆ lơ khôi luơ̆t. Lăp đơ̆ng rŏng pơm lêh pơgơ̆r blŭng a, 100% kơdră jang lơ̆m Dơnŏ anĭh chĕp pơgơ̆r Kuô̆k hô̆i hlôi pơdrơ̆ng kiơ̆ Tơdrong tơchơ̆t găh tơplĭh iŏk yua bri, tĕh bri păng tĕh jang ƀa kơ tơdrong vă jang ming man trong glung rĕnh Tu-Pơbăh găh hơlĕch jăl jang 2021 - 2025. Kiơ̆ kơ ‘nŏh, Dơnŏ anĭh chĕp pơgơ̆r Kuô̆k hô̆i ăn asong tơplih iŏk yua tĕh bri tĕh jang ƀa 2 pơyan năm tơ̆ lơ pơtêng hăm Tơdrong tơchơ̆t đơ̆ng Kuô̆k hô̆i păng tơplĭh iŏk yua bri rong vă tơtom tơlĕch jang kiơ̆ ming man keh đang ƀlep khei ‘năr pơkă. Adoi athei Khŭl kơdră chĕp pơgơ̆r tĕh đak pơm pơkeh hla bơar tơdrong au vă tơroi tơbăt ăn Kuô̆k hôi tơ̆ ‘măng hop akŏm mă 4 kơnh.

Tơblơ̆ nơ̆r: Amazưt