VOV4.Bahnar - Hơnơ̆ng bơ̆ jang Hop akom mă 15, pơgê năr 15/9, Dơnŏ anĭh chĕp pơgơ̆r Kuô̆k hô̆i ăn tơgop nơ̆r hơmet ăn ‘Măng hop akom mă 4, Kuô̆k hô̆i jăl XV. Kiơ̆ tơlĕch ăn, ‘măng hop akŏm mă 4, Kuô̆k hô̆i gô akŏm bơ̆ jang lơ̆m 22 năr; hop akŏm hmŏ hơdrol păng pơgơ̆r blŭng a lơ̆m năr 20/10. ‘Măng hop akom gô pơdrơ̆ng kiơ̆ 6 tơdrong vă pơjing khôi luơ̆t, 1 tơdrong tơchơ̆t păng ăn tơgop nơ̆r hăm 7 tơdrong vă pơjing khôi luơ̆t. Kuô̆k hô̆i mơ̆ng tơbăt păng pơma dơnuh găh: Pơtôch jang kiơ̆ trong pơ prŏ atŏk tơ iung mŭk drăm tơpôl păng kon jên jang tĕh đak sơnăm 2022; tơchơ̆t trong vă jang atŏk tơ iung mŭk drăm-tơpôl sơnăm 2023, kon jên jang tĕh đak păng trong klăh asong kon jên jang Trung ương sơnăm 2023. Lăng hơlen rim hla bơar tơbăt tơdrong bơ̆ jang kơ Dơnŏ anĭh tơm xek tơlang, Kơdră chĕp pơgơ̆r Dơnŏ anĭh jang dăr lăng hơlen tơdrong yoch; rim hla bơar tơbăt tơdrong bơ̆ jang đơ̆ng Khŭl kơdră chĕp pơgơ̆r tĕh đak găh tang găn hơlau, tơjră tang găn sa pơgơ̆m pơjĭp, tang găn khŭl yoch păng pơm glăi khôi luơ̆t, bơ̆ jang xek tơlang sơnăm 2022. Lăng hơlen hla bơar tơbăt pơtôch bơ̆ jang, lăng hơlen jang kiơ̆ Tơdrong tơchơ̆t kơsô̆ 30 găh rim trong jang tang găn jĭ hơbŭh COVID-19.

Tơblơ̆ nơ̆r: Amazưt