VOV4.Bahnar Kơdră chĕp pơgơ̆r Kuôk hô̆i Vương Đình Huệ hlôi kĭ Tơdrong tơchơ̆t kơsô̆ 17 sơnăm 2022 kơ Dơnŏ anĭh chĕp pơgơ̆r Kuô̆k hô̆i jăl XV găh jơ jang dơ̆ng lơ̆m 1 sơnăm, 1 khei kơ bơngai jang lơ̆m khei ‘năr tang găn jĭ hơbŭh Covid-19 păng hơmet ming, atŏk tơ iung mŭk drăm-tơpôl. Dơnŏ anĭh chĕp pơgơ̆r Kuô̆k hô̆i tơchơ̆t Tơdăh bơngai hơvơ̆h đe jang ‘mĕh vă hơvơ̆h păng đei bơngai jang drơ̆ng nơ̆r lei gơ̆h hơvơ̆h bơngai jang chă jang dơ̆ng hlŏh 200 jơ mă lei ư̆h kơ hlŏh 300 jơ lơ̆m 1sơnăm. Găh kơsô̆ jơ jang dơ̆ng lơ̆m 1 khei, tơdăh bơngai hơvơ̆h đe jang đei hơvơ̆h bơngai jang chă jang dơ̆ng lơ hlŏh ‘nŏh 300 jơ lơ̆m 1 sơnăm ‘mĕh vă hơvơ̆h jang păng đei bơngai jang drơ̆ng nơ̆r lei gơ̆h ăn bơngai jang chă jang dơ̆ng lơ̆m 40 jơ mă lei ư̆h kơ hlŏh 60 jơ lơ̆m 1 khei. Tơdrong jang kiơ̆ tơchơ̆t găh kơsô̆ jơ jang dơ̆ng lơ̆m Tơdrong tơchơ̆t au kăl pơm kiơ̆ tôm tong rim tơdrong pơkăp anai đei ƀơm trŭh Khôi luơ̆t Jang. Tơdrong tơchơ̆t au đei tơlĕch jang kiơ̆ đơ̆ng năr 1/4/2022.

Tơblơ̆ nơ̆r: Amazưt