VOV4.Bahnar - Pơgê năr 19/9, Khŭl bơ̆ jang Dăr lăng kơsô̆ 4 kơ Dơnŏ anĭh chĕp pơgơ̆r Trung ương găh tang găn sa pơgơ̆p pơjĭp, kơ yuơ Đại tướng Tô Lâm-Kơdră jang lơ̆m Dơnŏ anĭh tơm Chĭnh trĭ, Kơdră chĕp pơgơ̆r Dơnŏ anĭh tơm Kŏng ang, Kơ iĕng Kơdră Dơnŏ anĭh chĕp pơgơ̆r pơrô̆ jang tang găn sa pơgơ̆m pơjĭp, pơm kơdră khŭl hlôi bơ̆ jang hăm Khŭl kơdră chĕp pơgơ̆r Đảng dêh char Gia Lai vă tơbăt hơdăh pơtôch ‘măng dăr lăng bơ̆ jang tang găn sa pơgơm pơjĭp lơ̆m dêh char.

Pơma pơtôch tơ̆ jơ bơ̆ jang, Đại tướng Tô Lâm athei, Khŭl kơdră chĕp pơgơ̆r Đảng dêh char Gia Lai hơnơ̆ng atŏk kơtang chĕp pơgơ̆r, pơrô̆ jang vă atŏk jơhngơ̆m đon hlô̆h vao, hơnăp jang tơnăp đơ̆ng rim khŭl kơdră chĕp pơgơ̆r tơring lơ̆m ƀô̆h, sơng iŏk nơ̆r đe tơbăt, xek tơlang đe tơkêng, athei tơkêng rôp rim tơdrong pơm glăi găh sa pơgơ̆m pơjĭp, mŭk drăm, tơdrong au to. Đại tướng Tô Lâm athei dêh char Gia Lai kăl lăng ba kơ jăp hlŏh dơ̆ng lơ̆m chĕp pơgơ̆r, pơrô̆ iung jang rim dơnŏ anĭh bơ̆ jang ƀô̆h hrô̆ih rim tơdrong kơtơ̆ng ang găh tơdrong pơm glăi lơ̆m vei lăng groi tĕh, mŭk drăm cham char, vei lăng bri, xek tơlang kơhret rim bơngai, khŭl pơm glăi, adoi đei trong pơđep, tơbrar, tang găn hơlau, tơjra tang găn pơm yoch lơ̆m dêh char.

Tơblơ̆ nơ̆r: Amazưt