Kiơ̆ tơbăt, sơnăm 2022 akŏm tơmam drăm jang sa lơ̆m dêh char iŏk đei hlŏh 17.600 ti hlak jên, tŏk 9,5% pơtêng hăm sơnăm sơ̆. Thuê̆ ăn Hơnĭh mong jên bơ̆ jang tĕh đak đei 4.000 ti hlak jên, iŏk đei ƀlep trong tơlĕch jang.

Kiơ̆ đơ̆ng Dơnŏ anĭh Đảng dêh char Kon Tum trong tơlĕch jang kăl hlŏh ‘nŏh tŏk mŭk drăm lăp iŏk đei 9,5% ư̆h kơ ƀlep hăm trong pơprŏ Tơdrong tơchơ̆t tơlĕch ăn ‘nŏh tŏk đơ̆ng 10% năm tơ̆ lơ. Lơ̆m minh năr, hop akŏm hlôi akŏm pơma dơnŭh, tơgop nơ̆r hăm hla bơar chĭh tơbăt tơdrong jang kiơ̆ tơdrong jang mŭk drăm-tơpôl, vei lăng sơđơ̆ng Teh đak, sơđơ̆ng tơring,  tơ-iung pơjing Đảng, khŭl jang chĭnh trĭ sơnăm 2022, trong tơlĕch jang sơnăm 2023; Trong vă Pơprŏ dêh char Kon Tum jăl jang 2021- 2030, păng mĭnh ƀar tơdrong kăl anai.