VOV4.Bahnar - Hơmet ăn rim tơdrong jang ăn hơ iŏh lơ̆m khei năr pơdơ̆h hŏk sơnăm au, Dơnŏ anĭh Đoàn dêh char Dak Lăk tơlĕch lơ trong atŏk kơtang jang ‘lơ̆ng ăn khŭl kang ƀô̆ đoàn, mă kăl tơ̆ tơring.

Pơtho ming tơdrong jang ăn khŭl kang ƀô̆ đoàn

Mă hơdăh, Dơnŏ anĭh Đoàn pơgơ̆r pơtho tơbăt tơdrong jang dơ̆ng ăn kang ƀô̆ đoàn, hô̆i tơ̆ pơlei pơla, koeng kơphô̆ lơ̆m dêh char. Hăm lơ tơdrong nhen: hơbĕch hơbal lơ̆m pơgơ̆r tơpôl; tơroi tơbăt găh tơdrong jang đoàn, hô̆i ‘moi kiơ̆ lơ̆m rim trang mạng tơpôl; pơma tơ̆ hơnăp kơdrơ̆m bơngai păng dôm trong jang kăl hlŏh kơ Bí thư chi đoàn. Atŭm hăm ‘nŏh, Dơnŏ anĭh Đoàn dêh char Dak Lăk tŏk bŏk pơrô̆ hơvơn tơpôl vang iung jang vă tơ iung pơjing cham pơchơt pơ hiơ̆ ăn hơ iŏh, pơjing kơ trăi pơyan pơdơ̆h hŏk ăn hơ iŏh. Pơgơ̆r rim lăm hŏk pơtho ming hŏk pơhrăm pơyan pơdơ̆h hŏk ăn hŏk tro tơ̆ tơring tơnap tap, hơtăih hơtŏ.

Tơblơ̆ nơ̆r: Amazưt