VOV4.Bahnar - Ƀlep lơ̆m năr Têt joăt joe Chôl Chnăm Thmây sơnăm 2022, tang măt ăn Dơnŏ anĭh Trung ương MTTQ Việt Nam, Bí thư Trung ương Đảng, Kơdră chĕp pơgơ̆r Dơnŏ anĭh MTTQ Việt Nam Đỗ Văn Chiến pơtrŭh kơthơ hmach chơt hơ iă ăn rim bơngai lui phât păng kon pơlei Kmher. Lơ̆m kơthơ, ƀok Đỗ Văn Chiến pơtrŭh ăn rim bơngai lui phât păng kon pơlei Khmer rim tơring lơ̆m tĕh đak ling lang pran jăng grăng akau, pŭn ai, oei sa hơnŭk hơnoa. Sơng chơt hơ iă Têt Chôl Chnăm Thmây 2022, ƀok Đỗ Văn Chiến ‘mĕh vă rim bơngai lui phât păng kon pơlei Khmer hơnơ̆ng kiơ̆ yok rok jơ̆ng tơdrong joăt joe ‘lơ̆ng hơ iă kơ hơdrĕch hơdrung, tơgoăt tơgoăl pôm nơ̆r ƀơ̆r đon atŭm hăm Đảng, hăm kon pơlei, hăm đĭ đăng ƀô̆ đô̆i kŏng ang atŏk kơtang rim tơdrong jang pơting dĭh băl ‘mêm kơ eng tĕh đak, kơrŭn đĭ jơhngơ̆m jang keh đang rim trong tơlĕch jang atŏk tơ iung mŭk drăm, tơpôl hlôi đei Trung ương, tơring tơlĕch ăn; lăng kơ jăp jang kiơ̆ ‘lơ̆ng rim tơdrong jang tang găn jĭ hơbŭh, vei lăng sơđơ̆ng jơhngơ̆m jăn, akau jăn kơ rim kon pơlei; mĭnh jơhngơ̆m đon jang kiơ̆ ‘lơ̆ng rim trong tơlĕch jang vei lăng kon kông đơ̆ng Đảng păng tĕh đak, mă kăl ‘nŏh Tơdrong vă jang tĕh đak atŏk tơ iung mŭk drăm-tơpôl tơring kon kông păng groi kông jăl jang 2021-2030; atŭm hăm ‘nŏh hơdrin vei kơ jăp tơdrong oei sa joăt joe ‘lơ̆ng rŏ kơ hơdrung Khmer, akŏm đei lơ tơdrong oei sa ‘lơ̆ng liĕm pơ đĭ hơdrung Việt Nam.

Tơblơ̆ nơ̆r: Amazưt