VOV4.Bahnar - Năr au, năr 5/5, Hơnĭh tơm Pơtrŭt mơdro sa iung jang hơdoi hăm rim Hơnĭh jang Mơdro sa Việt Nam tơ̆ ASEAN pơgơr ‘măng tơbăt tĕch mơdro phe năm tơ̆ rim tĕh đak ASEAN. Hop akŏm au đei pơgơ̆r kơtă tơ An Giang atŭm hăm trư̆k tuyên ‘moi kiơ̆ kmăi kmŏk Zoom păng pơdăh hloi lơ̆m fanpage Facebook Hơnĭh tơm Pơtrŭt mơdro sa kơ Dơnŏ anĭh tơm vei lăng Mơdro sa. Tơ̆ hop akŏm tơbăt ăn gô pơma tơbăt hơdăh kơtă rim tơdrong hơdăh kơ rim hơnĭh mơdro sa đei ƀơm trŭh tơdrong atŏk tơ iung tĕch mơdro phe tơ̆ rim tĕh đak ASEAN. ‘Ngoăih Philippines, phe Việt Nam oei tĕch mơdro năm tơ̆ rim tĕh đak anai lơ̆m ASEAN nhen Malaysia, Singapore, Indonesia, Brunei. Tơdrong tĕch mơdro phe Việt Nam tơ tĕh đak đe tŏk bŏk roi năr roi kơtang rim kơ loăi phe ƀau phu, phe ‘lơ̆ng, phe Japonica, phe kok ‘lơ̆ng hăm kơ jă tĕch măt. Trong tơlĕch ăn tĕch mơdro phe tơ̆ tĕh đak đe kơ lơ̆m tĕh đak bơ̆n hlôi đei hơmet ming, trŭh sơnăm 2030, tơchĕng lăng lăp pă dang 4 trĭu tân.

Tơblơ̆ nơ̆r: Amazưt