VOV4.Bahnar - Năr 11/7, Kơ iĕng Kơdră chĕp pơgơ̆r Dơnŏ anĭh tơm vei lăng Mŭk drăm bri brăh păng Cham char Lê Công Thành hlôi năm dăr kăng bơ̆ jang tang găn tŏ ‘mi kial pơrăm tơ̆ dêh char Kon Tum.

Ƀok Lê Công Thành bơ̆ jang hăm Dơnŏ anĭh vei lăng kon pơlei dêh char Kon Tum

Kiơ̆ tơbăt, blŭng sơnăm 2021 tŏ phang pơđang tơ̆ dêh char pơm hiong răm hlŏh 93ha ‘long pơtăm; ‘mi kial hơbŭt hơbông pơm ăn 3 ‘nu bơngai lôch, 136 pơbŭng hnam ƀơm răm kơnê̆ păng hlŏh 700 ha ‘long pơtăm hiong răm; lơ trong nơnăm, pơnơ̆t đak hư răm, pơm hiong răm trŭh dang 126 ti hlak jên. Vă vĕh ver păng pơm dă ƀiơ̆ tŏ ‘mi kial pơrăm kơtang, dêh char Kon Tum apĭnh pơjing 27 tơdrong vă jang kăl tơmơ̆t jên jang lơ̆m jăl jang 2021-2025 hăm akŏp kon jên tơmơ̆t jang vă jê̆ 900 ti hlak jên vă yông, pơjing pơlei ‘nao ăn hlŏh 2.500 ŭnh hnam hăm dang 10.000 ‘nu kon pơlei. Iung pơma tơ̆ jơ bơ̆ jang, Kơ iĕng Kơdră chĕp pơgơ̆r Dơnŏ anĭh tơm vei lăng Mŭk drăm bri brăh păng Cham char Lê Công Thành athei dêh char Kon Tum lăng kơ jăp trŭh tơdrong tŏ ‘mi kial lơ̆m dôm khei vă đĭ sơnăm, hơmet ming rim trong jang vă ƀô̆h băt tơtom tŏ ‘mi kial pơrăm ăn khŭl năm jang tơgum dŏng; răt kmăi kmŏk điên thoăi vê̆ tĭnh ăn rim tơring ngăl đei ‘mi kial pơrăm kơtang ư̆h kơ gơ̆h lĕch vĕh tơ̆ nai…

Tơblơ̆ nơ̆r: Amazưt